BANNER: Addan suspek iti pannakapapatay polis iti natayan: SITG

SALCEDO, Ilocos Sur – Iti kaudian nga impormasion manipud iti Special Investigation Task Force (SITG), addan suspek iti pannakapapatay ti maysa nga Intelligence officer bayat ti pannakilamayna iti natayan sadiay Sitio Masilag, Barangay Poblacion Norte ditoy nga ili idi rabii ti Oktubre 23.

Ngem saan pay nga impalgak ti SITG no asino ti suspek malaksid nga imbagana nga insayangkat dagiti local dissident terrorists wenno NPA ti pammapatay.

Nabuangay ti SITG tapno mangiwayat iti in-depth investigation mainaig iti pannakapapatay ni PO1 Reynaldo Daciego y Lames, 33 bayat ti pannakilamayna iti maudi a rabii ti pimmusay nga ulitegna.

Agbuybuya ni Daciego iti sugal a pusoy idi kellaat nga immasideg ti maysa nga armado a lalaki sana pinaltogan ti polis a nakatiruan ti muging ti biktima ken nakadalebanna.

Arayaten koma ni Aurelio Alabag, Jr. y Tayaben ni Daciego ngem sabali pay nga armado a lalaki ti nangpaturong iti paltog kenkuana isu a nagsanud.

Madamdama, sabali pay nga armado a lalaki ti immasideg sana pinaltogan ti nadalupo a polis a nakatiruan ti akimbaba a paset ti tengnged ti biktima idinto nga imballaagna ti panagpakleb dagiti tattao.

“Dapa kayong lahat, dapa!” imbilin ti di nabigbig a suspek idinto a nagpaputok iti ere.

Kalpasan nga innala dagiti suspek ti selpon ken paltog ti polis, naglibasda a pimmanaw iti saan nga ammo a direksion.

Iti panagimbestiga ti nagtipon a personnel ti SOCO Candon City ken Ilocos Sur Police Provincial Office, nakarekobreda iti crime scene iti maysa a kapsula manipud iti cal. 45 ken maysa a kapsula manipud iti 9mm.

Kabayatanna, naitabon itay Nobiembre 3 ni Daciego idinto a nagaramat dagiti amin a personnel ti Ilocos Sur Police Provincial Office iti nangisit a lazo iti tsapada kas senial iti panagladingitda.

Naikabil met dagiti bandera iti half mast kadagiti amin a police stations iti probinsia.

Kanaig daytoy, inkari dagiti adda iti Intelligence ti panangiwayatda iti naun-uneg nga inbestigasion mainaig iti pammapatay ken iti panangibaklayda iti mandato a mamagtalinaed iti urnos ken talna iti probinsia iti baet dagiti pammutbuteng ken peggad.

Kinuna met ti PPO a mai-patungpal ti karina a ‘mapagtalkan ken mapagpiaran a serbisio publiko’ idinto nga impasiguradona, uray iti pannakaipasungalngal ti bukodda a biag, nga amin nga Ilocos Surian ket mariknada ti kinatalged ken seguridad.#