Footer

BANNER: Agim-imon a misis, 2 kakaduana, nakasuan iti frustrated murder

CAOAYAN, Ilocos Sur – Napilaan iti kaso dagiti tallo a babai a nangkabil ken nangpainom iti sabidong iti balasang a nasukalan a kadua ti mister ti maysa kadagiti suspek iti uneg ti kuarto ti maysa a bar resort a masarakan iti Barangay Naguilian ditoy nga ili idi malem ti Mayo 13.

Iti kaudian a report, naipa-iman iti opisina ti provincial prosecutor, Vigan City ti kaso a frustrated murder, serious illegal detention ken robbery maikontra kada Ma. Geshiel Reyna y Fernandez, 27; Jelica Pisalbo y Barcesa, 29; ken Clarissa Pulangco y Alfos, 48, residenteda amin iti Barangay Raois, Vigan City gapu iti panangkabilda ken panang-painomda iti sabidong ni Cathyrina Domingo y Espiritu, 34, awanan asawa, residente iti Barangay Bacsil Angad, Bangued, Abra, mapapati a babai ni Jayson Reyna y Bulda, 27, asawa ni Ma. Geshiel.

Nasukalan ti biktima a kaduana ni Jayson iti maysa a kuarto ti Alad Bar Resort a masarakan iti Barangay Naguilian, Caoayan.

Kas maibatay iti panagim-bestiga dagiti polis, idi agarup 2:30 ti malem ti nadakamat a petsa, mapapati a nagkita da Jayson ken ni Domingo iti nasao a resort ket nangupada iti kuarto.

Ngem di ammo dagiti dua a nasiiman ida ni Ma. Geshiel, kaduana da Pisalbo ken Pulangco ket simrek dagitoy iti kuarto sada naggaambonan a kinabil ti biktima ken kaba-yatan ti panangulodda iti suelo, binuyatanda iti Zonrox ti ngiwat ken bagi daytoy.

Gapu iti komosion iti uneg ti kuarto, nagpalutpot ti guardia sa bimmallaet.

Naipan ti biktima iti Gabriela Silang General Hospital tapno maagasan dagiti litem ken dunorna iti nadumaduma a paset ti bagina idinto a nai-kustodia dagiti tallo iti police station gapu iti inaramidda. (Tawid News)