BANNER: Auditorium, napugsitan iti pinta, NPA masuspetsa akin-aramid

STA. LUCIA, Ilocos Sur – Napugsitan iti pinta ti parupa ti auditorium ken sumagmamano a waiting shed ditoy nga ili a mapapati a naisayangkat idi rabii ti Nobiembre 30 ken suspetsaen ti kapolisan a gapuanan dagiti kameng ti New People’s Army.

Agsapa ti Disiembre 1 idi nakaawat ti police station ditoy nga ili iti maysa a report a naispreyan iti nangisit a pinta ti sango a diding ti Governor Titong Singson Memorial Auditorium a masarakan iti Barangay Angkileng ditoy nga ili.

Dagus a nagresponde ti kapolisan nga indauluan ni Police Senior Inspector Ramil R. Mendioro ket idi maberipikada a positibo ti report, kinunada nga aramid daytoy dagiti masuspetsa a kameng wenno supporters ti NPA kas maibatay kadagiti naipugsit iti parupa ti auditorium a pakaibilangan ti: “SUMAPI SA NPA! KM”, RPSB OUT NOW KM” ken “NPA KM”.

Napugsitan pay iti “NPA” ti makannigid a paset ti ambulansia daytoy nga ili.

Iti insayangkatda a panag-sukimat iti national highway, naduktalan dagiti pannakabagi ti linteg a napugsitan pay kadagiti umasping a balikas dagiti waiting shed iti Barangay Vical, Lubong ken Catayagan.

Awan ti nailanad iti report a partikular a grupo nga akin-aramid iti daytoy a bandalismo.

Inreport pay ti kapolisan ti nadakamat nga ili ken ti Ilocos Sur Provincial Police Safety Command (ISPPSC) a naburadan dagiti propaganda a balikas maikontra iti gobierno a naipugsit kadagiti nadakamat a pasdek.#