BANNER: Balikbayan, nabiktima ti Budol-Budol Gang

VIGAN CITY – Ballaag daytoy iti publiko: agas-assisaw manen dagiti manangallilaw a tattao nga agsipsiput iti biktimaenda nangruna ket agdudupudop manen dagiti sangaili ditoy siudad gapu maang-angay ti selebrasion ti Solidarity.

Idi malem ti Septiembre 2, maysa nga overseas Filipino worker ti namati iti nasam-it a palabra ti dua a babai a nagtungpal iti pannakalokona ken pannakapukawna iti kuarta nga agdagup iti P230,000.00, di pay ammo ti kadagupan a balorda nga alahas, ken selponna.

Segun iti report, idi agarup 4:30 ti malem ti Septiembre 2, sumrek koma iti Puregold, Vigan City Branch ni Violeta Quiton Amano,70, OFW a naggapu iti Italy, ken residente iti Barangay Tamag, Vigan City, idi inasitgan ti dua a babbai ti balikbayan sada ginayyem.

Bayat ti panagpapatangda, impasirip dagiti dua a babbai ti iggemda a ginumpon a doliar iti kuarta sada intanggaya a suktan ni Amano iti kuarta.

Kinuna ni Amano a kasla nahipnotismo ket simmursurot lattan iti pagayatan dagiti babbai.

Kinuna ti biktima a simmurot kadagiti babbai a naglugan iti puraw a kotse agraman ti dua a lalaki a pakairamanan ti drayber ket napanda iti maysa a Decor Stone iti Bantay, Ilocos Sur.

Kalpasanna, kinuyog dagiti suspek ti biktima a naggawid iti balayna tapno alaenna ti kuartana a P60,000.00, ken nadumaduma nga alahas a pakaibilangan ti kuentas, aritos, ken selponna.

Simmaruno a napan ti suspek iti Metro Bank Vigan Branch ket inruarna ti P170,000.00 bayat nga inuray dagiti suspek iti sanguanan ti Del Pilar Drug Store iti Bonifacio Street, Vigan City.

Kalpasan a nairuar ni Amano ti kuartana, napanda iti Bantay ket ditoy a nagiinnallawatda: ti kuarta ken alahas ti biktima nga inkabil ti biktima ti kuarta, alahas, ken selponna iti maysa a bag idinto a naikabil dagiti ginumpon a doliar iti sabali a bag sa naited ken ni Amano a nakakandado.

Naduktalan laengen ni Amano a naallilaw idi nakapanawen dagiti suspek ket nagpulong iti polis.
Dagus a nagsawar dagiti polis ken nangipatulodda pay iti flash alarmn kadagiti kaarrubada a police station ngem negatibo ti resultana.#