BANNER: Barangay captain, pinapatay riders in tandem

VIGAN CITY – Pimmusay iti ospital ti maysa a barangay captain sumagmamano nga oras kalpasan ti panangpaltog kenkuana dagiti armado a lalaki a nagkasakay iti motorsiklo sadiay Barangay San Julian Sur ditoy siudad idi rabii ti Oktubre 26.

Pimmusay ni Barangay Captain Purisimo Dante Francisco Jr., 46, naasawaan, ken residente iti Barangay III, ditoy siudad, idi agarup 11:19 ti rabii ti nadakamat a petsa bayat ti pannakatamingna iti Metro Vigan Cooperative Hospital.

Ngem sakbay a natay, naipalgak ti biktima ken ni Edgardo Pinol Bibit a nakalugan iti traysikelna idi napaltogan a maysa nga Archie Dela Cruz ti maysa kadagiti suspek a nangpaltog kenkuana.

Addan iti ikut ti polis ditoy ti nasao a suspek idinto a maisagsagana ti kaso maikontra kenkuana.

Iti panagimbestiga ti polis, agdaldaliasat nga agpadaya ti traysikel a minaneho ti biktima iti barangay road a sakup ti Barangay San Julian Sur, Vigan idi manipud iti likudan, immasideg dagiti suspek a nagkasakay iti motorsiklo ket pinaltogan ti back rider ti barangay captain iti sumagmamano a beses.

Kalpasanna, nagbuelta dagiti suspek ket naglibasda iti laud a direksion.

Iti panagproseso ti SOCO team nga indauluan ni Chief Inspector Laya iti crime scene, nakarekobreda iti maysa a Gauge 12 break open handgun nga adda nakaselsel iti chamberna a kapsula a mapapati a nabati dagiti suspek.

Kabayatanna, maysa a drug personality ti pinaltogan dagiti riders in tandem iti plasa ti Barangay Sabangan, Santiago, Ilocos Sur idi agarup 4:50 ti malem ti Oktubre 26.

Nainaganan ti biktima a maysa a Robert Dela Cruz y Molina, aka Bobby, 48, naa-sawaan, laborer, ken residente iti nadakamat a barangay.

Maysa a drug pusher surrenderer, nakalista ni Dela Cruz a kas No. 3 drug personality, high value target level 2 ken miembro ti Tengsico-Cabreros Criminal Drug Group nga agop-opera iti Santiago area ken kabangibangna nga ili.

Kas maibatay iti inbestigasion, agtaktakder ti biktima iti sango ti maysa a tienda idi immasideg dagiti di nabigbig a suspek a nagaruat iti nangisit a bonnet ken cap a naglugan iti di ammo ti klasena a motorsiklo sada pinaltogan ti biktima iti sumagmamano a beses a nagsagrapan daytoy iti sugat iti nadumaduma a paset ti bagina.

Nasugatan ti makannigid a saka ni Ruby Mae Campilla y Delos Santos, 16, high school student babaen ti naiwawa a bala.

Naitaray da Dela Cruz ken ni Campilla iti Candon City Hospital para iti pannakaagas dagiti sugatda ngem naideklara ni Dela Cruz a dead on  arrival.

Nakarekobre dagiti kameng ti SOCO team iti crime scene ti 13 a kapsula manipud iti cal. 45, 2 a cartridge cases ti cal. 45, ken 2 a metallic fragments ken 3 a buli manipud iti cal. 45.

Naipan dagiti ebidensia iti opisina ti SOCO para iti ballistics examination.

Saan pay nga ammo ti motibo ti pammapatay.#