BANNER: Baro a modus operandi ti Salisi Gang: menor de edad ti pagtakawenda

CABUGAO, Ilocos Sur – Adda kabarbaro a modus operandi ti grupo dagiti mannanakaw a mangbikbiktima kadagiti negosiante: maysa a menor de edad ti kakumplotda nga agkurimes iti kuarta ken dadduma pay a napateg a sanikua kadagiti pagtagilakuan.

Nagballaag ti kapolisan ditoy iti panagridam dagiti negosiante nga adda puestoda nangruna iti tiendaan publiko kalpasan a nagreport ti maysa a babai a negosiante a natakaw ti bagna a naglaon iti kuarta, alahas ken bank books iti mismo a puestona iti uneg ti tiendaan ditoy nga ili idi bigat ti Hunio 2 a maysa a menor de edad ti masuspetsa a nangisayangkat.

Nagpulong iti polis ni Editha Braceros y Serna, 53, naasawaan, ken residente iti Barangay Baclig, ditoy nga ili, a natakaw ti bagna nga impaknina iti sirok ti lamisaan iti uneg ti tiendana iti Cabugao public market ket mapapati a maysa nga ubing nga agtawen iti dose ti nangitaray iti daytoy bayat ti panangasikasona iti maysa a babai a masuspetsa a nagpammarang a kustomer idi agarup 10:00 ti bigat ti nadakamat a petsa.

Nagkarga ti nangisit a shoulder bag ni Braceros iti P123,000.00 cash, diamante a singsing nga agbalor iti P60,000.00, maysa a bangle bracelet nga aggatad iti sumurok-kumurang a P55,000.00, bank book iti PNB, ken 2 a bank books ti di nadakamat no ania a rural bank,

Kas panangisalaysay ni Braceros, simrek iti tiendana ti maysa a babai a mapattapatta nga agtawen iti 30 ket nagpammarang nga adda gatangenna.

Idi naiyawat ni Braceros ti gatangen ti suspek, nagsubli iti tugawna ket ditoy a naduktalanna nga awanen ti bagna nga inkabilna iti sirok ti lamisaanna ken nakaikabilan ti kuarta, alahas ken dagiti libritona iti bangko.

Maysa a saksi ti nagkuna a nakitana ti maysa nga ubing nga agtawen iti 12 a rimmuar iti tiendana a bitbitna ti maysa a nangisit a bag kabayatan nga as-asikasuenna ti kustomerna a babai a masuspetsa a kumplot ti ubing.

Nangiwayat dagiti polis iti pursuit operation maikontra kadagiti suspek ngem saandan a nasapulan dagitoy.

Kanaig daytoy, imballaag ti kapolisan ti panagsiput dagiti negosiante nga adda puestona iti tiendaan iti Salisi Gang, nangruna no babai ken ubing ti agpammarang a kustomer tapno dida agbalin met a biktima ti panagtakaw.#