Footer

BANNER: Bilin ti PNP regl director: insidente ti krimen, maikabassit; pannakasolbarda, maipangato

CAMP ELPIDIO QUIRINO, BANTAY, Ilocos Sur – Imbilin ti PNP regional director iti kapolisan ditoy probinsia ti pannakaibassit ti insidente ti krimen ken ti pannakaipangato ti pannakasolbar dagitoy iti hurisdiksion a masakupanda.

Kinuna ni Police Chief Supt. Luizo Cristobal Ticman bayat ti command conference nga inangayna iti panagbisitana ditoy itay Oktubre 8 a masapul a maikabassit iti 10 porsiento ti insidente ti krimen ken maingato iti 10 porsiento ti pannakasolbar dagitoy iti hurisdiksionda a lugar.

Immandar pay ni Ticman kadagiti hepe ti polis nga igunagunamda a kasapulan ti panangidaulo ken naan-anay a superbision kadagiti taoda tapno masigurado ti pannakaipatungpal ti integrated transformation program ni PNP Chief Jesus Verzosa.

“Masapul nga agtalinaed ti napintas nga imahe ni Mamang Pulis para iti mas epektibo a panagserbi,” kinuna ni Ticman.

Kabayatanna, inpresentar da Ilocos Sur Provincial Director Virgilio Fabros ken ni Ticman dagiti paltog ken airsoft gun a nakompiskar ti PNP iti Cabugao.

Karaman ditoy ti maysa a .22 Squirbingham  ken maysa nga Armscor 12 gauge shotgun nga addaan iti 12 a bala a nakumpiskarda iti ikut ni Clarence Inocelda ken ni Peter Azcueta, agpada a taga Brgy. Daclapan, Cabugao. Naala met kada Mario Baclig, Ronald Baclig ken Jason Fermin ti Brgy. Pug-os, Cabugao ti dua nga airsoft rifle M-16 model.

Segun ken ni Fabros,  nakompiskar dagiti armas iti raid nga nga insayangkat dagiti polis nga indauluan da Supt. Panfilo Racho ken Cabugao Chief of Police Saturnino Ediong idi Octobre 7.

Indagadag pay ti regional director a rebisaren dagiti COP dagiti plano ken programada tapno makita no maiyannatup daytoy iti agdama a situasion iti masakupanda.

“Masapul a maikabassitda iti at least 10% ti crime incidents ken maingatoda iti at least 10% met ti crime solution efficiency iti masakupanda iti binulan. Masapul nga awan ti agturogturog iti puestoda tapno agbalinda a mapagtalkan nga agserserbi,” innayon pay ti RD.#