BANNER: Dati a Presidente Marcos, naitabon iti Libingan ng mga Bayani

Kalpasan ti 27 a tawen manipud ipapatayna ken iti sanguanan dagiti protesta a saan a maikari a maitabon iti Libingan ng mga Bayan, naipumpon met laengen ni dati a Presidente Ferdinand E. Marcos itay Nobiembre 18 iti nasao a sementerio.

Naibiahe ti remains ni Marcos babaen ti helicopter manipud iti  Batac, Ilocos Norte a nakaidulinan ti bangkayna ket naisangpet iti LNMB sakbay ti agmatuon.

Adu ti naklaat nangruna dagiti kontra-Marcos ken dagiti biktima ti Martial Law idi naammuanda a naitabonen daytoy iti Libingan ng mga Bayani iti nadakamat a petsa. Awan ti napalubosan a kameng ti media a mangkober iti pannakaitabon ti dati a Presidente.

Idi Nobiembre 8, naikkat ti bangen iti pannakaitabon ni Marcos iti Libingan ng mga Bayani kalpasan nga imbasura ti Korte Suprema dagiti petision a mangpaspasardeng iti pannakaitabonna iti LNMB.

Babaen ti butos a 9-5, imbasura ti Nangato a Pangu-koman dagiti petision a mang-konkontra iti pannakaitabon ni Marcos iti Heroes’ Cemetery.

Maipalagip a namindua a pinawaywayan ti Korte Supreme ti status quo ante order sakbay ti panagdesisionna idi Nobiembre 8 a nangipalubosanna iti pannakaitabon ni Marcos iti LNMB.

Sumagmamano nga argumento ti majority: awan ti nakaro a panagabuso iti diskresion ni Presidente Duterte iti panangibatadna a pabor a maitabon ni Marcos iti LNMB; awan ti linteg a mangiparit iti pannakaitabon ti dati a Presidente iti nasao a sementario; addaan ti gobierno iti bileg a mangireserba iti babaen ti Administrative Code dagiti daga a mausar para iti public domain; iti paglintegan ti AFP, ikut ni dati a Presidente Marcos dagiti kualipikasion a maitabon iti LNMB gapu ta dati a commander in chief, dati a soldado ken dati a sekretario iti national defense; saan a naikkat ni Marcos nga awanan dayaw; saan a nakonbiktar ni Marcos iti aniaman a pangngeddeng a nakainbolbaran ti moral turpitude.

Ngem kinuna ni dati a Bayan Party-list representative Satur Ocampo a nakigtotda agsipud ta impakdaardan nga agipilada iti mosion para iti rekonsiderasion mainaig iti pangngeddeng ti Korte Suprema tapno saan a maituloy ti pannakaitabon ni Marcos iti LNMB.

Idi Nobiembre 16, narugian ti siam nga aldaw a palualo ken ni Marcos nga agtunged iti Batac City inton Nobiembre 24 ngem iti maikatlo pay la nga aldaw ti pasiam, Biernes, naibiahe ti bagi ni Marcos iti Manila sa naitabon iti Libingan ng mga Bayani.

Iti statement ni Gov. Imee Marcos kalpasan ti tabon, pinagyamananna ni Presidente Rodrigo R. Duterte ken ti Korte Suprema iti pannakaipalubos  a maitabon ti amada iti LNMB.

Kanaig daytoy, imparang met ni Atty. Yvette Convento-Leynes, abogada ti pamilia Marcos, ti dua-pahina a maudi a testamento ti dati a Presidente a nangibatadanna a kayatna ti maitabon iti Libingan ng mga Bayani, maisupadi kadagiti damdamag a kayatna ti maitabon iti abay ti inana a ni Josefa Edralin Marcos iti Batac City.

Iti umuna a probiso, insurat ni FEM: “I desire that my remains be buried according to the rites established by law and with dignity suitable to my position and other personal circumstances.” (Tarigagayko a maitabonak iti rito kas intuding ti linteg ken iti dignidad a maiyataday iti posisionko ken sabali pay a personal a sirkumstansia.)

“Pinatototohanan (ng last will and testament) ang sinasabi ng Marcos family na gusto niyang (Presidente Ferdinand Marcos) mailibing sa Libingan ng mga Bayani, and not beside his mother,” Convento-Leynes.

Ngem kinuna ti maysa a grupo a kontra-Marcos a pakaibilangan ni Ocampo a mangipilada iti petision iti Korte Suprema a mangpa-contempt of court kadagiti Marcos, navy ken militar agsipud iti panangitabonda iti dati a Presidente iti LNMB idinto a di pay naungpot ti 15 nga aldaw a panagipila iti petision para rekonsiderasion nga intuding ti Nangato a Pangukoman . (Tawid News)