Footer

BANNER: Droga, carnapping kitkitaen kapolisan motibo ti pammapatay iti Magsingal

MAGSINGAL, Ilocos Sur – Droga wenno carnapping ti kitkitaen dagiti inbestigador nga anggulo mainaig iti pannakapapatay ti dua a lalaki sadiay Sitio Liwliwa, Barangay Caraisan, ditoy nga ili idi malem ti Septiembre 19.

Napaltogan idi agarup 2:30 ti malem ti nadakamat a petsa a puon ti ipapatayda da Alvin Jay Tiri y Tabula, 22, baro, residente iti Barangay San Julian, Magsingal, ken Thaddeus Villalon y Salvador, 43, baro, ken residente iti Barangay San Basilio, Magsingal.

Iti pannakaisurat daytoy, saan pay nga ammo ti kinasiasino dagiti nangpaltog kadakuada.

Ngem segun iti polis, sumangsangoi ni Tiri iti kaso a carnapping sadiay San Nicolas, Ilocos Norte idinto a panagsalungasing iti R.A. 9165 ti naipila maikontra ken ni Villalon iti Regional Trial Court Branch 24, Cabugao, Ilocos Sur.

Iti panagimbestiga ti polis, sakbay ti pammaltog, nakita dagiti biktima ken dagiti suspek nga agpapatang iti asideg ti basketball court.

Mapapati a kellaat a pinaltogan dagiti suspek a nakahelmet ken nakaaruat iti nangisit a diaket ken nakalugan iti big bike ni Villalon a nagsagrapanna kadagiti sugat iti ulo ken bagina a puon ti dagus a nakatayanna.

Timmaray ni Tiri ngem kinamat dagiti suspek sada pinaltogan a nagsagrapanna met kadagiti sugat iti ulo ken bagina a nagresulta iti dagus nga ipapatayna.

Nakarekobre dagiti inbestigador iti uppat a buli ken innem a kapsula a nagtaud iti caliber 45 pistol iti nakapasamakan ti krimen.

Nakarekobreda pay iti ikut ni Villalon iti cash money iti nadumaduma a denominasion nga agdagup iti P2,440.00, maysa naaramat a rolio ti foil, ken 3 a babassit a plastic sachet a naglaon iti mapapati a shabu.

Naipaima dagitoy kadagiti nagresponde a kameng ti SOCO a nakabase iti Ilocos Sur Police Provincial Office, Bulag, Bantay, Ilocos Sur.

Naipan met iti kustodia ti police station ditoy dagiti motorsiklo dagiti biktima agraman ti selponda.

Agtultuloy ti panagimbestiga dagiti polis mainaig iti nasao a pammapatay.#