BANNER: Drug personality napaltogan bayat ti drinking spree

VIGAN CITY – Nasurok makalawas kalpasan ti pannakapapatay ti maysa a barangay captain, dua manen ti nagsaruno a napaltogan ditoy siudad idi Nobiembre 8 ken 9.

Napaltogan ni Romnick Arce y Puzon, 24, awanan asawa, sadiay Liberation Boulevard, Barangay 3, Vigan City idi sardam ti Nobiembre 8 idinto a nagandat met ti biag babaen ti paltog ni Raymund Aluit y Fernandez, 47, naasawaan, idi rabii ti Nobiembre 9.

Kas maibatay iti police journal, madama ti panaggiinom da Arce ken maysa a Marvin Pablico y Ancheta, 22, residente iti Barangay 4, Vigan City iti ruar ti Boyet Store idi immasideg dagiti suspek a nakalugan iti asul a Honda XRM motorcycle ket pinaltogan ti back rider ni Arce iti sumagmamano a daras a nakatiruan ti bagina.

Napuntaan iti naiwawa a bala ti makannigid a saka ni Heneroso Reyes y Orio, 21, naasawaan ken residente iti Barangay Nagsangalan, Vigan City a nairana nga adda iti asideg iti napaltogan ni Arce.

Naglibas dagiti suspek a nagturong iti laud a direksion.

Naitaray da Arce ken ni Reyes iti Gabriela Silang General Hospital para iti pannakaagas dagiti sugatda.

Iti panangproseso ti SOCO manipud iti Ilocos Sur Police Provincial Office, Bulag, Bantay iti crime scene, nakarekobreda iti lima a kapsula ken dua a deformed slug a nagtaud manipud iti cal. 45.

Kitkitaen dagiti inbestigador no adda pakainaigan ti droga ti pannakapaltog ni Arce. Karaman ni Arce iti drug watch list ti Vigan police station ken boluntario a simmuko idi Hulio 29, 2016.

Iti sabali a bangir, nabigbigen ti suspek a nangpaltog ken ni Aluit a maysa a Michael Dagdag y Dasalla, 34, kalugaran met laeng ti biktima.

Di pay ammo no ania ti motibo ni Dagdag a nangpaltog ken ni Aluit.

Napasamak ti pammaltog bayat ti panaggiinom ti biktima ken dagiti kaanakanna iti arubayan ti balayda idi agarup 10:30 ti rabii ti Nobiembre 9.

Bayat ti drinking spree, kellaat nga immasideg iti grupo ti traysikel a minaneho ni Dagdag ket pinaltogan ti suspek ti biktima iti sumagmamano a beses ngem ti laeng makannigid a saka daytoy ti natiruan.

Naglibas a dagus ti suspek iti daya a direksion.

Nakarekobre dagiti polis iti pito a cartridges ken maysa a bala manipud iti cal. 45 iti crime scene.

Kabayatanna, napilaanen iti kaso ti suspek iti pannakapapatay ti barangay captain ti Barangay III idi Oktubre 26, 2016.

Napilaan iti murder ni Archie dela Cruz, 37, naasawaan, ken residente iti Barangay III, Vigan City gapu iti panangpaltogna ken ni Barangay Captain Purisimo Dante Francisco, Jr. a puon ti nakatayan daytoy.

Kadua ni Dela Cruz a naidarum ti maysa a John Doe a mapapati a kumplotna a nangiwayat iti krimen.

Sakbay a pimmusay ni Francisco, nailatakna ken ni Edgardo Pinol Bibit a pasaherona idi napasamak ti pammaltog a ni Dela Cruz ti maysa kadagiti nangpaltog kenkuana. (Tawid News Team)