BANNER: E-library, inlunsad ti gobierno probinsial

VIGAN CITY – Duapulo a computer sets ti inted ti gobierno probinsial iti biblioteka ditoy kas paset ti panangilunsadna iti electronic library iti probinsia itay nabiit.

Kinuna ni Governor Ryan Singson a dakkel a katulongan dagiti estudiante dagiti e-library agsipud ta nalawlawa pay ti masursuroda malaksid laeng a maaramidda dagiti proyektoda iti pagadalan ken makaresertsda.

Innayon ti gobernador a maragpat pay dagiti umili iti e-library ti kayatda a maammuan nga impormasion nangruna dagiti agbirbirok iti panggedan wenno dagiti agpangpanggep a mangirugi iti negosio.

Kinuna ni Singson nga “agbibiagtayon iti digital age ket panawenen a padur-asentayo dagiti pasilidadtayo ken ti panagbiag dagiti umilitayo. Babaen daytoy a serbisio ti gobierno probinsial, matulongan dagiti estudiante a manggun-od dagiti tagainepda.”

Idi 2013, narenobar ti pasdek ti provincial library, ket nainstolaran dagiti kuarto iti airconditioning unit.

Kinuna ni Singson nga agpaay ti e-library a napintas a sagut kadagiti estudiante idinto nga innayonna a bumassit ti tiempoda nga agaramid kadagiti kasapulanda iti pagadalan.

Kinuna met ni Emma Claudio, dadaulo ti provincial library, a nasayaat a solusion daytoy kadagiti estudiante nga agkurkurang iti alawansda agsipud ta libre para iti amin ti e-library.

Pangpanggepen ti gobierno probinsial a pagbalinen ti e-library a nakalukat agingga iti 8:00 ti malem manipud iti 5:00 ti malem tapno maikkan iti ad-adu pay a tiempo dagiti estudiante a mangaramat iti e-library. (Manipud iti report ti PIO, Ilocos Sur)