BANNER: Hepe ti Salcedo District Hospital, nagpaputok iti kolorum a paltog kas panangrambakna iti kasangayna

SALCEDO, Ilocos Sur – Sumagmamano a saludsod ti kasapulan a lawlawagan ti hepe ti ospital ken ti guardia ti Salcedo District Hospital mainaig iti panagpaputok a napasamak iti mismo nga ospital idi malem ti Oktubre 2.

Apay a saan a lisensiado ti paltog a pinagpaputok ti hepe ti ospital ditoy idi selebrasion ti kasangayna? Naggapuan ti shotgun? Ammo kadi ti guardia a saan a lisensiado ti naiyisio kenkuana a paltogna?

Apay nga adda karga a bala ti shotgun, kasungani ti nailanad iti journal nga imbaga ti guardia nga awan balana? Naggapuan ti bala?

Polisia kadi daytoy nga ospital a mabalin ti aggiinum no adda maselebraran a pasken kas iti kasangay ti hepe ti ospital uray bayat ti oras ti opisina?

Ngem agsakit la ketdi ti ulo ni Dr. Federico Anaen y Suen, 48, naasawaan, hepe ti Salcedo District Hospital agsipud ta naipaiman iti opisina ni Assistant Provincial Prosecutor Christopher Habab ti kasona nga alarm and scandal babaen ti panagpaputokna iti saan a lisensiado a paltog a napasamak a mismo iti nadakamat nga ospital idi agarup alas sais ti malem ti Oktubre 2.

Kas maibatay iti panagimbestiga dagiti polis, kas selebrasion ti kasangayna, naggiinum da Anaen ken sumagmamano nga empleado ti nasao nga ospital a pakaibilangan da Ricardo Ronquillo, Herbert Agroilan ken Juvy Quiabang iti kusina ti ospital.

Mapapati nga idi nabarteken ni Anaen, binilinna ni Ronald Ramos y Bang-asan, 30, security guard, a mapanna alaen ti shotgun nga isyo daytoy a dagus met nga inted ti guardia. Imbaga ti guardia ken ni Anaen nga awan ti karga a bala ti shotgun. Kas maibatay iti journal, agarup 5:00 ti malem iti dayta a petsa idi inyawat ni Ramos ti shotgun ken ni Anaen.

Rimmuar ni Anaen a nakaiggem iti shotgun ket mapapati a pinaturonganna ti maysa a Ric Valdez a nakasabatna.

Inanawa da Ramos, Ronquillo ken Garrido ti doktor ket idi naaddaan ni Garrido iti gundaway, inagawna ti paltog sana inted iti guardia a dagus a nangipakni iti armas iti opisina ti Out-Patient Department.

Kalpasan ti sumagmamano a minutos, napan manen ni Anaen iti puesto ti guardia sana imbilin nga itedna ti shotgun.

Idi damo, nagkedked ni Ramos a mangited iti isyona a paltog ngem impetteng ni Anaen nga isu ti boss iti ospital isu nga intedna ti shotgun.

Nagturong ni Anaen iti dayaen a paset ti hspital sana impaputok ti shotgun iti naminsan iti ngato.

Segun iti report, mismo a nasaksian ni Virginia Danioan y Lingbaoan, 27, naasawaan, casual nurse, ti panagpaputok ni Anaen.

Timmawag ni PO1 Ernesto Dingoasen, Jr. a nairana nga adda iti ospital iti police station idinto a pinagtalna ni Sonny Boy Garrido y San Juan, 43, ken empleado iti nasao nga ospital ti doktor sana innala ti shotgun ken insuko ken ni Dingoasen.

Inaresto dagiti nagresponde a polis ni Anaen sada impan iti police station agraman ti shotgun ken ti empty shell para iti dokumentasion ken dispposision.#