BANNER: Illegal drug trade kitkitaen polis nakagudasan agama a drug personality

VIGAN CITY – Kalpasan a naipakni ti ama, naisaruno kadi a napapatay ti anak maigapu iti illegal drug trade?

Maysa daytoy nga anggulo a kitkitaen dagiti inbestigador mainaig iti pannakapapatay ti dua a drug personalities iti V. Delos Reyes Street, Barangay 2, Vigan City idi agsapa ti Agosto 25.

Napaltogan da Michael Molina y Calderon, 32, awanan asawa, konduktor, ken residente iti Barangay Mira, Bantay, Ilocos Sur ken ni Roger Del Castillo y Javier, 44, naasawaan, tricycle driver, ken residente iti Barangay Tamag, Vigan City bayat a nakasardeng ti kotseda iti kanto ti V. Delos Reyes Street, Barangay 2, Vigan City idi agarup 7:25 ti agsapa ti nadakamat a petsa.

Segun iti report, karaman ni Michael Molina  iti drug watch list ken surrenderee iti Bantay Police Station idinto a nakalista met a drug personality ken surenderee ni Del Castillo iti Vigan City Police Station.

Segun ken ni Marites Poca y Javier, 39, naasawaan, kasinsin ni Molina, ken residente iti Barangay Mira,  simmardeng apagbiit ti Mitsuhishi Pajero a minaneho ni Molina iti sango ti maysa a motorcycle repair shop iti nadakamat a kalsada tapno dumsaag dagiti ubbing a mapan agbasa, idi mapasamak ti pammaltog.

Mapapati nga immabay dagiti suspek a naglugan iti motorsiklo iti kotse sa pinaltogan ti back rider dagiti biktima iti nagsasaganad sada naglibas iti daya a direksion.

Nupay nadunor, pinataray ni Molina ti kotsena agingga  iti St. James Hospital, Pantay Daya, Vigan City, ngem mapapati a nagsatanda ken ni Del Castillo iti anges sakbay a makadanonda iti ospital.

Nangipatulod dagiti nagresponde a polis-Vigan iti flash alarm kadagiti kabangibang a police stations para iti posible a pannakatiliw dagiti suspek ngem negatibo ti resultana.

Iti panangproseso ti SOCO, Ilocos Sur Police Provincial Office iti crime scene, nakarekobreda iti tallo a kapsula manipud iti cal. 45. Sabali laeng ti 4 a kapsula iti isu met laeng a kalibre iti uneg ti Pajero.

Nakasukal pay dagiti inbestigador iti maysa a submachine gun cal. 45 a nagmarka iti Ithaca Gun Co, Inc. US No. 752957 nga addaan magazine assembly a nagkarga iti 4 a bala ken 15 a bala ti  cal .45 ken maysa a samurai iti uneg ti Pajero.

Ngem sabali pay nga anggulo a kitkitaen ti polis no adda koneksion ti shooting incident iti sabali pay a pammaltog a nakagudasan ti maysa a Mario Molina y Palacpac, aka “Boy”, 59, naasawaan, negosiante, iti asideg ti pagpallotan iti bisinidad ti Barangay Poblacion, Sto. Domingo, Ilocos Sur idi malem ti Hunio 30.

Segun iti mapagpiaran a source, ama ni Michael ti nasao a biktima ti pammaltog a mapapati a karaman met iti drug personality watch list ti Bantay Police Station.

Maipalagip nga idi agarup 6:30 ti malem ti nadakamat a petsa,  kagapgapu ti laklakay a Molina iti Sto. Domingo Cockpit Arena a nakigalieraanna ket bayat a magmagnada, kaduana ti managan Rodel Abad y Barroga, 38,  ken Arnel Adaya y Adaya, 49, nga agturong iti Mitsubishi Pajero a kotsena, kellaat a nagparang ti di nabigbig a suspek ket pinaltoganna ti bikima iti sumagmamano a beses a nagsagrapan daytoy iti sugat iti gurong ken tianna.

Pimmusay ti biktima bayat ti pannakatamingna iti Northside Doctor’s Hospital a nakaitarayanna.

Agtultuloy ti panagimbestiga dagiti polis no adda koneksion dagitoy dua a pammaltog.#