BANNER: Ilocos Sur back to back National Quality Corn Achiever Awardee

VIGAN CITY – Inyalat manen ti provincial government ti Ilocos Sur iti daytoy a tawen ti National Quality Corn Achiever Award,

Mismo a ni Ilocos Sur Governor Ryan Singson ti nangawat iti pammadayaw iti 4th National Quality Corn Achievers Awarding Ceremony a naangay iti The Farm, Koronadal City, South Cotabato idi Nobiembre 16, 2016.

Malaksid iti plake ti pammigbig, immawat ti Ilocos Sur iti P3 million cash award.

Itay napan a tawen, pinadayawan ti Department of Agriculture ti Ilocos Sur kas National Corn Achiever Awardee gapu ta nagun-odna ti mapagwadan a nangato-ti-gradona nga apit a mais nga addaan iti average a 2.24 metric tons yield increment.

Iti daytoy a tawen, kas maibatay iti random sampling nga inwayat dagiti evaluators manipud iti Department of Agriculture, nagdoble ti produksion ti mais iti probinsia ket immabot iti 5.8 metric tons.

Kinuna ni Singson a dakkel a nagapuanan ti administrasionna daytoy back-to-back a panangabak ti probinsia idinto nga innayonna a nagun-od daytoy babaen ti napigsa a support ti gobierno probinsial, ti Departamento ti Agrikultura ken dagiti lokal a gobierno, babaen ti maipagpannakkel a panagtrabaho nga impakita ti sektor dagiti mannalon.

Maipalagip a manipud idi nagtugaw a kas gobernador iti Ilocos Sur, inyussuat ni Singson dagiti sumagmamano a programa a pangpadur-as iti mais tapno dumakkel ti produksion ken maipangato ti kalidad dagiti bukel ti mais a maimula kadagiti kataltalonan iti probinsia.

Karaman ditoy ti suporta iti produksion, probision iti ramramit-talon, sistema ti irigasion ken pamataudan iti danum, pannakaited dagiti makinaria iti talon, suporta iti panagsanay ken iti pay suporta iti panaglako a nagtunda iti nangato ti kalidadna a produkto ti mais.

Kinuna ni Singson a maysa a karit “daytoy a balligi ita a tawen no kasano a susteneren ken ad-adda pay a padur-asen ti industria ti mais” idinto nga innayonna a nakatulong kadagiti mannalon iti post-production ti inawatda a cash award idi napan a tawen babaen dagiti nagatang a sumagmamano a unit ti makinaria.

Kinuna ti gobernador a maiyalokar manen kadagiti mannalon ti inawat ti probinsia a cash award ngem bay-anda a dagitoy ti mangikeddeng ania ania a kita ti proyekto a pakabenepisiaranda.

Kanaig daytoy, napadayawan pay iti nasao a seremonia ni Provincial Agriculturist Constante Botacion kas outstanding provincial agriculturist of the Philippines ken ni Oscar Tobias kas outstanding provincial corn coordinator.

Nabigbig pay ni Grace Cardona ken Diosdado Mendoza ti Sta. Maria, Ilocos Sur kas outstanding municipal agriculturist ken outstanding municipal corn coordinator; ken ni Ronan Tumbaga ti Bantay, Ilocos Sur ken ni Oliver Quidangen ti Burgos, Ilocos Sur kas outstanding agricultural extension works.#