BANTAY, Ilocos Sur – Boluntario a simmuko iti kapolisan ti maysa a kagawad a suspek iti pannakapaltog ti maysa a katulong itay nabiit.

Iti progress report manipud iti police station ditoy, boluntario a simmuko ni Rhodyan Pacpaco y Kong, 26, awanan asawa, barangay kagawad, ken residente ti Barangay Sagpat, Bantay Ilocos Sur kas resulta iti follow-up investigation nga inwayatda mainaig iti pannakapaltog ni Joey Pablico y Tabrilla, 27, awanan asawa ken residente iti Barangay Sagpat idi rabii ti Agosto 22.

Segun iti polis, nakakustodia iti police station ni Pacpaco kalpasan a nagpirma iti extrajudicial confession babaen ti tulong ti abogadona.

Naipaima metten ti kaso a homicide maikontra ken ni Pacpaco iti prosecutor’s office.

Maipalagip a napaltogan ni Pablico idi aggawiden kalpasan ti drinking spree iti balay ti kaarrubana idi rabii ti Agosto 22.

Intaray dagiti nagresponde a polis ti biktima iti Metro Vigan Cooperative Hospital ngem indeklara ti doktor a nangtaming kenkuana nga awanen ti biagna.

Sakbayna, timmawag ni PO1 Jonathan P. Angala, nakadestino iti Ilocos Sur Police Provincial Office iti Bantay Police Station nga adda napasamak a pammaltog iti barangayda. Nadatngan dagiti nagresponde a polis ni Pablico a naidalutaytay iti kalsada ken nadigos iti bukodna a dara.

Iti panagimbestiga dagiti polis, naammuan a sakbay ti pammaltog, nagturong ni Pablico iti balay ti kaarrubana a ni Joselito Pablo y Pilot, 28, naasawaan, helper, ket naggiinomda kadagiti kalugaranna a nainaganan Michael Quintero y Pablico, Roderick Quintero y Inoc, ken ni John Joseph Alcaide y Cabintoy, 18, awanan asawa, helper, ken residente iti Mangcagan, Bucay, Abra.

Kas maibatay ti report, aggawiden ti biktima idi napaltogan iti sumagmamano a beses a nagsagrapanna kadagiti sugat iti barukong, tengnged ken likudna.

Iti panangproseso ti SOCO ken KIMAT teams, nakaalada iti maysa nga slug iti likud ti bangkay.

Saan a nailanad iti report no ania ti motibo ni Pacpaco a nangpaltog ken ni Pablico. (Tawid News)