BANNER: Kangayedan a Viva Vigan Binatbatan Festival, rambakan ti Siudad ti Vigan

VIGAN CITY – All systems go iti panangrambak ti siudad ditoy iti makalawas a Viva Vigan Binatbatan Festival of the Arts a mangrugi inton Mayo 1 ken agpatingga inton Mayo 8.

Kinuna ni Mayor Eva Marie S. Medina a daytoy ti ibilangna a kangayedan a panangrambak ti siudad iti Binatbatan Festival agsipud ta karagpin iti parambak ti seremonia ti inagurasion iti panagbalin ti Vigan City a New7Wonders City of the World a maangay inton Mayo 7.

Immun-una ngem daytoy itay Enero 28, 2015, inawat ti Siudad ti Vigan iti panangidaulo ni Medina ti resolusion ti komendasion manipud iti Senado gapu iti pannakapilina a maysa iti New7Wonders Cities of the World ken gapu iti panagbalinna a modelo iti heritage conservation.

Ni Senate President Franklin Drilon ti nangiyawat iti Senate Resolutions 1053, 1057, 1085 and 1130 a pinutar ni Senator Pia Cayetano kadagiti opisial ti Vigan City nga indauluan da Medina ken Congressman Ronald Singson.

Manamnama a dar-ayan a mismo ti presidente ti New7Wonders Foundation a ni Bernard Weber ti inagurasion a pattapattaen dagiti agtuturay iti Vigan City a dar-ayanto pay dagiti agkakangato nga opisial ken dignitario iti pagilian, nalalatak a personalidad iti kagimongan, sangsangaili ken turista.

Sangapulo ket lima a tawen kalpasan a nailista ti Vigan City iti UNESCO List of World Heritage sites and monuments idi Disiembre 1999, idi Disiembre 7 itay napan a tawen, maysa daytoy maikatlo a kaduogan a siudad iti Pilipinas a napili a New7Wonders Cities of the World a pakaibilangan ti Beirut, Lebanon; Doha, Qatar; Durban, South Africa; Havana, Cuba; Kuala Lumpur, Malaysia; ken La Paz, Bolivia.

Iti daytoy a selebrasion, kinuna ni Medina a malaksid kadagiti regular nga aktibidad a maang-angay iti tinawen, kas iti food and trade fair a maangay inton May 1, bankathon ken fishing competition (May 2), tradisional a pasalip iti ramada iti Poblacion barangays ken dog show (May 3), traditional games, carabao painting ken pasagad dressing contest, boklan art contest ken tile contest (May 4), kalesa parade and contest (May 6), namnamaenda a rinibribu a tattao ti agbuya iti Binatbatan Streetdancing parade a maangay iti alas tres ti malem ti Mayo 2 ken ti Showdown a maangay iti Plaza Burgos iti 7:00 ti karabianna.

Agpabuyanto pay ti Philharmonic Orchestra Concierto inton May 6 iti sanguanan ti St. Paul Cathedral.

Inton May 7, maangay ti concelebrated mass iti St. Paul Cathedral, pannakabendision ti Nueva Segovia Consortium of Cooperatives (NSCC) Vigan Hotel and Central Office, ken ti inagurasion ti Vigan Conservation Complex iti Barangay San Julian.

Tampok nga event iti daytoy nga aldaw ti inaugural ceremony ti Vigan kas New 7 Wonder City a maangay iti sango ti St. Paul Cathedral.

Kabigatanna, May 7, maysa a motorcade ti maangay iti aglawlaw ti Vigan kas New Wonder City kasta met iti pannakabendision ken pannakalukais ti N7W Monument iti sango ti Vigan City Hall. (Salvador A. Espejo)