BANNER: Katulagan ti sister-city relation nagbaetan Honolulu City, Candon City, napirmaan

HONOLULU, Hawaii – Napatapatan ti sister-city relationship ti Candon City ken Honolulu City babaen ti katulagan a napirmaan iti maysa a seremonia a naangay iti Mission Memorial Auditorium, Honolulu, Hawaii idi malem ti Mayo 7, 2015.

Sinaksian dagiti agkakadayaw a lider iti gobierno, sibiko ken gunglo Filipino daytoy panagpinnirma iti katulagan ti panagkabsat da Mayor Kirk Caldwell a nangibagi iti Honolulu City ken ni Mayor Ericson Singson a nangibagi iti Candon City.

Karaman a nagpirma iti katulagan da Honolulu Council Chair Ernie Martin ken ni Candon City Council Chair Rhodana Cortez Abrero.

Iti panagsaritana, kinuna ni Caldwell a “ti panagbaniaga a nangrugi idi naglugan dagiti umuna a Sakada iti S.S. Doric ken pimmanaw iti Candon nga agturong iti Hawaii idi 1906 ket nagbalin a naan-anay a sirkulo ita (pannakapirma ti sister-city relationship).”

“With the formal recognition of the deep ties between Honolulu and Candon City, our two cities now begin a new chapter in a partnership that dates back over a century” (“Iti pormal a panangbigbig iti nauneg a patapat iti nagbaetan ti Honolulu ken Candon City, rugian ita dagiti dua a siudadtayo ti baro a tsapter iti panagkadua a nangrugi maysan a siglo ti napalabas,” kinuna ni Caldwell.

Binigbig pay ti mayor dagiti sumagmamano a Filipino nga immuna a nagtakem iti nangato a puesto iti gobierno iti Hawaii.

Iti met panagbitla ni Mayor Ericson Singson, nagyaman kadagiti amin a nakipartisipar iti pannakaplano ken pannakapirma iti katulagan ti sister-city relationship ti dua a siudad.

Panggep daytoy pannakaipasdek iti sister-city relationship iti nagbaetan ti Honolulu City ken Candon City ti naun-uneg a panagdayaw iti tunggal maysa, respeto ken panagkinnaawatan iti nagbaetan ti dua a siudad, ken iti pannakaipasa daytoy a relasion kadagiti masakbayan a henerasion nangruna dagiti umili ti Honolulu a mangiladladawan pay laeng iti bagida a kas Candonian.

Kas paset ti katulagan, napag-anamongan dagiti dua a siudad ti panangpadur-as ken panangpapigsada iti nainkabsatan a linas iti nagbaetan dagiti umilida babaen ti panangipromotda iti social, cultural, agricultural, ken ekonomic development iti nalawlawa a sakup dagiti programa a kas iti turismo, edukasion, siensia ken teknolohia, ken inter-island a komunikasion.

Iti babaen ti espiritu ti panaggayyem, napag-anamongan dagiti lider ken umili dagiti dua a siudad ti panangmentenerda iti regular a kontak tapno magun-odda a dua dagiti makaparabur nga aksion.
Ti Candon City ti maika-32 a siudad a simrekan ti Honolulu City iti sister-city relationship.#