BANNER: Knights of Rizal, nadumaduma a grupo, nangisayangkat protesta kontra mapatpatakder a condo

MANILA – Nangisayangkat iti rali idi Hulio 17 ti Order of the Knights of Rizal, a sinuportaran dagiti grupo nga indauluan ti Freemasonry ken gunglo dagiti agtutubo iti Luneta Park, kas panagprotestada iti pannakabangon ti maysa a natayag a condominium iti Taft Avenue, Manila.

Mismo a ni Knights of Rizal Supreme Commander, Jeremias Singson ti nangidaulo iti nasao a protest action nga inawaganda iti “Demolish Torre De Manila” a naangay iti pasetna ti Burnham Greene iti Luneta Park.

Nagbalin a napudot nga isyo ti pannakabangon ti high-rise a condominium a patpatakderen ti DMCI agsipud ta palaadenna ti buya iti likudan ti monumento ni Dr. Jose Rizal, ti national hero ti pagilian.

Kinuna ni KoR Supreme Commander Singson a mangiwayatdanto pay kadagiti protest actions agingga nga adda desision ti Korte Suprema iti petisionda.

Kinuna pay ti agdama a bokal iti Ilocos Sur a suportado dagiti Filipino iti amin a paset ti lubong ken uray dagiti saan a Filipino iti kampaniada.

Kanaig daytoy, dinawat ni Singson ti suporta ti gobierno ti siudad ti Vigan nga idadauluan ni Mayor Eva Marie S. Medina ken ti sangguniang panlungsod nga idadauluan ni Vice Mayor Lourdes Baquiran ti panangsuportada iti ipagpagnada a pannaka-demolish ti high-rise condominium iti Taft Avenue.

“Vigan City is known to be a home of culture and heritage preservation and protection. This is the same domain the Order (of the Knights of Rizal) is fighting for. Respect our culture and heritage,” kinuna ni Singson idinto a dinawatna iti gobierno ti siudad ti panangadaptarna iti battle cry ti Order a “Demolish Torre de Manila”.

Nagaruatda iti nangisit, nangiwayat dagiti nagprotesta iti “solidarity march” ken impabuyada ti “simboliko a pannakarakrak” ti Torre de Manila.

Nagkakanta pay dagiti nagprotesta kadagiti patriotic songs a kas iti Bayan Ko.

Dinawat pay da Singson ken ni Presidente Benigno Aquino ti panagpirmana iti online petition kas suportana iti ipagpagnada.

Maysa nga honorary member iti Order of the Knights of Rizal ti presidente.
Inton Martes, Hulio 21, maangay dagiti oral arguments iti petision ti Order of the Knights of Rizal iti Supreme Court a nangidagadag iti nangato a pangukoman iti pannakarakrak ti nasao a patakder agsipud ta dadaelenna ti buya ti nailian a patrimonio ken tawid.

Kinuna ni Singson a suportaranda ti aniaman a desision ti Korte Suprema ngem mangnamnamada nga ayonan ti Korte Suprema ti tawagda, agsipud ta “Filipinoda met”.#