BANNER: Layus, allawig, insangbay ni Bagyo Ineng iti Ilocos Sur

VIGAN CITY – Nupay saan a dimmalan ni Bagyo Ineng iti Ilocos Sur, ginuyodna ti habagat a nangibuyat iti napigsa a tudo a nanglayus kadagiti nadumaduma a paset ti probinsia, nangruna dagiti nababa a lugar.

Malaksid iti layus, dinalapus ti allawig ti kabalbalayan sadiay Sitio Ermita, San Sebastian, San Vicente, Ilocos Sur a nakaitayaban ken nakarakrakan dagiti bubongda idi Agosto 21 bayat ti matutudo a tiempo nga insangbay ni Bagyo Ineng.

Naireport a karaman a naitayab ni Maricel Ragasa ken ti agtawen iti 6 a bulan nga anakna idi naitayab ti bubong ti balayda.

Nupay nadunor dagiti agina, saanda ketdi a napakaruan.

Naireport pay a dinalapus ti allawig ti kabalbalayan sadiay Barangay Nagsabaran, San Juan, Ilocos Sur a nakarakrakan met ti bubong dagiti kabalbalayan.

Segun ken ni Mang Loreto, maysa kadagiti biktima, matmaturogda idi simmiplag ti napigsa nga angin ket idi malukagda, awanen ti tuktok ti balayda.

Kinuna met ni Edwin, maysa met laeng a lumugar, a nakitana ti agpuspusipos nga angin a simrek iti balayda ket kellaat lattan a naitayab ti bubong ti balayda.

Kinunana a nasaripatpatan ti allawig a naggapu iti katal-talonan iti lauden ti barangayda.

Kabayatanna, apaman a naammuanna ti napasamak, nagturong ni Gov. Ryan Singson iti Sitio Ermita ket nagiwaras iti relief goods kadagiti biktima.

Nangipatulod met ni Cabugao Mayor Edgardo S. Cobangbang, Jr. kadagiti rescuers a timmulong kadagiti biktima.

Naammuan pay ken ni Singson a sumagmamano nga upland municipalities ti isolated agsipud iti panagdinakkel dagiti karayan.

Iti Caoayan, kinuna ni Mayor Germie Singson-Goulart a nagdinakkel ti danum agingga iti labes ti siket iti Sitio Corocodan, Barangay Fuerte. Nasurok 200 ti naireport a naibakuit iti Fuerte Elementary School.

Segun ken ni Goulart, underwater metten ti Barangay Villamar ken Tamurong, ngem nakasaganan dagiti lugan no kasapulan a maibakuit dagiti lumugar.

Innayonna a no sumayaat ti tiempo ken apaman a makastrek dagiti lugan, mangipanda iti relief goods kadagiti nasao a barangay.

Iti Barangay Poro, nakasagana metten dagiti barangay officials a mangibakuit kadagiti agindeg iti barangay hall no dumakkel latta ti danum, kinuna ti mayora.

Kanaig daytoy, nagpatulong ni Goulart ken ni Barangay Captain Edgar Pajaro iti Beddeng Laud tapno ipabulodna ti loader tapno maluktan ti sabangan iti Fuerte.

Kabayatanna, gapu iti di agressat a panagtudona, nagdinakkel ti Abra river ket mapattapatta nga uppat a pulgada laengen ti saan a pakasalpaan ti danum iti kalsada ti Banaoang Bridge.

Nupay kasta, naammuan ken ni Barangay Captain Naty Leones a nakapagsakbayen dagiti bumarangay no agdinakkel latta ti karayan ket nairakeddan iti nangato a paset dagiti rakit, kalding, baboy, ken dadduma pay a dingnguen.

Iti Vigan City, nalayus dagiti sumagmamano a kalsada ti siudad a pakaibilangan ti sango ti Vigan City Convention Center.

Nagpatnag met a minonitor dagiti agtuturay ditoy siudad nga indauluan ni Mayor Eva Marie S. Medina, ken ti City Disaster Risk Reduction Managment Council iti panangidaulo ni Milagros Alquiza, CDRRM Officer, ti situasion dagiti agindeg iti asideg ti Mestizo river.

Naipadamag nga idi Agosto 22, mangrugin a sumalpa ti nagdinakkel a danum ti igid ti karayan ngem nadaras a nages-es ti danum idi nagsardeng ti tudo.

Nupay kasta, kinuna ti maysa nga agindeg iti Barangay 9 a nakasaganadan nga agbakuit no agdinakkel latta ti karayan.

Iti Villa Quirino, San Esteban, malaksid kadagiti reprep, maysa a baka ti naisadsad iti pantalan ditoy.

Iti report ni Konsehal Marvin Ong, tagtagiuray dagiti agindeg ti sanitary inspector no mabalin pay a partien a mauraga ti bangkay ti baka.

Sabali laeng ti naireport a naisadsad a baka iti igid ti baybay a sakup ti Barangay Bateria a pinarti dagiti lumugar sada inuraga, kinuna ni Ong.

Iti Sta. Catalina, rineprep met dagiti kayo a naisadsad iti igid ti baybay ket uray no dakes ti panawen, naruay dagiti agindeg ti napan nagala iti pagtungoda.
Iti met Barangay Paratong, arig-karayan dagiti kataltalonan ket ti laengen murdong dagiti raep ti makita.

Uray iti Poblacion, immabut ti danum ti kagudua ti pilid ti lugan. Kapilitan a nainayad ti panagpataray dagiti motorista agsipud ta saanen a maripar ti kalsada iti kaadalem ti danum. (Tawid News Team)