Footer

BANNER: Nabuangay nga Ilocos Sur Farmers Protection Board saan nga encroachment iti NTA – hunta probinsial

VIGAN CITY – Impetteng dagiti kameng ti sangguniang panlalawigan ditoy a probinsia a saan a panangsakaw iti pagrebbengan ti National Tobacco Administration ti nabuangay nga Ilocos Sur Farmers Protection Board.

Kinuna ni Bokal Ishmael Baterina a nabuangay ti Ilocos Sur Farmers Protection Board a mangmonitor iti industria a tabako tapno matulongan dagiti mannalon iti tabako ket saan a panangsakaw daytoy iti pagrebbengan ti NTA kas ibagbaga dagiti opisial ti nasao nga ahensia.

“If you try to monitor… help your constituents… if you are after their welfare, is that encroachment? I don’t think so,” kinuna ni Baterina, chairman ti committee on agriculture ti sangguniang panlalawigan.

Itay nabiit, impasa ti sangguniang panlalawigan ti maysa nga ordinansa a mangipasdek iti Ilocos Sur Tobacco Farmers Protection Board gapu kadagiti reklamo dagiti mannalon mainaig iti nababa a presio ti tabako a pinaggatang dagiti traders ken nababa a pannakagrado daytoy a produktoda.

Idauluan ti bise gobernador ti nasao a board ket agkameng ditoy ti NTA ken dadduma nga ahensia ti gobierno, non-government organizations (NGOs) ken grupo dagiti mannalon.

Ngem iti surat ni NTA Administrator Edgardo Zaragoza a naiturong iti sangguniang panlalawigan babaen ken ni Provincial Secretary Atty. Ellen D. Cabatu, kinunana a duplikasion laeng ti panagtugaw ti NTA kas kameng iti Tobacco Farmers Protection Board iti pagrebbengan nga ipatpatungpalda manipud pay idi 1959.

Iti suratna, kinuna pay ni Zaragoza a ti laeng NTA ti specialized nga ahensia a kakaisuna a nabuangay a mang-regulate iti industria ti tabako … eksklusibo dagiti pagrebbenganna ket awan ti sabali a linteg a mang-otorisar iti pannakabuangay ti sabali a unit ti sabali a sanga ti gobierno uray pay ti Department of Health, BFAD wenno Department of Trade and Industry.

Segun pay iti surat, otorisado laeng ti local government unit kas sagudayen ti Local Government Code of the Philippines a mangbukel kadagiti komite… para laeng iti basic services and facilities … daytoy a debolusion iti bileg ket saan a karaman ti panangsakaw iti responsibilidad nga inreserba ti nasional a gobierno para kadagiti specialized agencies kas iti NTA, PhilRice ken dadduma pay.

Ngem kinuna ni Vice Governor Deogracias Victor Savellano a nabuangay ti Ilocos Sur Tobacco Farmers Protection Board kas monitoring ken mangtulong iti NTA para iti pannakapasayaat ti industria ti tabako ket dapat nga ikonsidera ni Administrator Zaragoza para iti pagsayaatan dagiti agmulmula iti tabako.

Kinuna met ni Bokal Robert Tudayan a kas nabayagen nga agmulmula iti tabako, mariknana ti rigat dagiti tobacco farmers ket inyunay-unayna a nabuangay ti Ilocos Sur Farmers Protection Board tapno tumulong kadagiti padana nga agmulmula iti tabako.

Kinuna met ni Bokal Edgar Yabes a tinawen nga adu ti isyo no panagtatabako ken nupay adda mapaspasamak a tripartite agreement, awan met pagbambanaganna, isu a daytoy a tobacco board ket mangtulong, mangkita ken mangisakit kadagiti mannalon nga agmulmula iti tabako.

Kanaig daytoy, kinuna ni Bokal Pablito Sanidad, Jr. a nabuangay ti Ilocos Sur Tobacco Farmers Protection Board tapno protektaranna ti interes dagiti agmulmula iti tabako ket saanda nga amendaran iti baet ti panangrediek ni NTA Administrator Zaragoza iti panagtugaw ti idauluanna nga ahensia a kas kameng.

“No bilang agbaliw ti panunot ni Administrator Zaragoza ket mangipatulod ni Zaragoza iti pannakabagina iti Ilocos Sur Tobacco Farmers Protection Board, well and good, ngem saanmin nga amendaran ti ordinansa,” kinuna ni Sanidad.#