BANNER: Nadumaduma a balbala nakumpiska iti bodega ti konsehal

SALCEDO, Ilocos Sur – Pinulpullo a bala ti nakumpiska dagiti polis iti bodega ti maysa a konsehal sadiay Barangay Pias ngem negatibo iti paltog ken droga.

Kas maibatay iti report manipud ti polis ditoy nga ili, idi agsapa ti Disiembre 6, sinukisok dagiti nagtitipon nga elemento ti kapolisan ti warehouse ni Salcedo Sangguniang Bayan Member Rogelio Tudayan Biteng, Sr. a masarakan iti nadakamat a barangay ngem awan ti droga ken paltog a nasukainanda no di laeng pinulpullo a balbala.

Mismo a ni Supt. Elpidio N. Nartatez, DPDO ti nangidaulo iti joint elements ti PIB, PIDMB, OPB, ISPPSC, PAIDG, PCR, agpapada a naggapu iti ISPPO, Salcedo Police Station, PDEA Region 1 ken 81st Philippine Army iti nangiwayat iti panagsukisok bodega ni Biteng babaen ti bileg ti Search Warrants No. 2 ken 3, series of 2016 nga inyisio ni Judge Policarpio Martinez ti RTC Branch 71, Candon City.

Dagiti sumaganad ti nakumpiska iti bodega ni Biteng: maysa a Bushnel Rifle Scope para iti M-16 Armalite Rifle; maysa nga asul nga ammo box a nakaikargaan ti 21 a bala para cal. 45, 7 bala para cal. 45, ken 40 bala para cal. 9mm; maysa a berde ammo box a nagkarga iti 5 bala para cal 5.56, ken maysa a kapsula manipud iti cal. 45; 7 blangko a bala para iti cal 7.62; 4 bala para cal. 7.62; 5 bala para cal 5.56; maysa a bala para cal. 45; 7 empty shells for cal. 30; maysa a kapsula manipud iti Magnum 22; 4 plunger caps para cal 45 (1911); 3 guide rods para cal 45 (1911); maysa a forward assist para M-16 Armalite Rifle; maysa a bushing cap para cal 45 (1911); 4 magazines ti di ammo a kalibre ti paltog; maysa a barrel assembly para M-16 Armalite rifle, ken 3 holsters para pistol.

Iti dayta met la a petsa, sinukisok pay ti nadakamat a grupo ti kapolisan ti balay da Cesar Quezada Bautista ken dagiti agassawa a Chrsitopher Quezada ken Ma. Teresa Canillo Quezada a masarakan iti Barangay Salcedo ditoy met laeng nga ili ket nakakumpiskada iti uppat a bala para iti cal. 9mm.

Nupay awan ni Biteng idi masukisok ti bodegana, adda a presente dagiti ag-Quezada ken sinaksian dagiti barangay officials ken pannakabagi ti Department of Justice ken media ti naisayangkat a panagsukisok.

Iti kaudian a report, naiyawaten iti provincial prosecutor’s office, Vigan City kaso a panaglabsing iti RA 10591 maikontra kada Biteng ken Cesar Bautista y Quezada.

Kabayatanna, tallo pay a tattao ti nasaklangan iti kaso a panaglabsing iti RA 10591 kalpasan a nagpositibo ti nagsaruno a search operations ti inwayat ti kapolisan sadiay Sinait ken ditoy nga ili idi Disiembre 7 ken 8 a nagresulta iti pannakakumpiskada kadagiti nadumaduma a bala ken armas.

Iti pannakaisurat daytoy, naipaiman iti city prosecutor ditoy siudad ti kaso a panaglabsing iti RA 10591 maikontra kada Ronnie Puzon Arce, 28, naasawaan, ken Robert Puzon Arce, 23, awanan asawa, agpada a residente iti Barangay 3, Vigan City idinto a maisagsaganan ti kaso maikontra ken ni Maximino Calibuso y Cubangbang, 42, naasawaan, ken, residente iti42 years old, married, unemployed and a resident of Brgy. Calanutian, Sinait, Ilocos Sur.

Maipalagip nga idi agarup 4:30 ti agsapa ti Disiembre 7, sinukisok ti polis-Vigan nga indauluan ni Supt. Villaflor Sabio Bannawagan ti balay dagiti ag-Arce ket nakakumpiskada iti innem a bala para iti cal. 38; 4 bala para iti 12 gauge shotgun ken 8 pedaso ti nadumaduma a patadem.

Imet dagiti polis ti Search Warrant No. 33, s. of 2016 nga inyisio ni Judge Francisco Ante, Jr. ti MTCC, Vigan City a napetsaan iti Disiembre 6, 2016.

Iti sabali pay a damag, awan ti nasarakan dagiti nagtitipon nga elemento ti kapolisan a droga ngem maysa a paltog ti nadumaduma a balbala ti nasukainanda iti balay ni Calibuso sadiay Barangay Calanutian, Sinait, Ilocos Sur bayat ti panagsukisokda idi agarup 6:15 ti agsapa ti Disiembre 8.

Dua a search warrants nga inyisio ni Judge Raphiel F. Alzate ti RTC, Branch 24, Cabugao, Ilocos Sur ti iggem ti nagtipon nga elemento ti CIDG Ilocos Sur, PAIDG, PIB, Maritime Group, PIDMB ken ISPPSC, idi sinukisokda ti balay ni Calibuso ngem negatibo ti resulta ti SW No. 15 agsipud ta awan ti nasukainanda a droga idinto a positibo ti SW No. 14 agsipud ta nakakumpiskada kadagiti sumaganad:

Maysa a cal. .45 STI SPARTAN bearing serial number EC111777; maysa a magazine assembly para cal. .45; 8 a bala para cal. .45; maysa a nangisit nga inside holster for cal. .45; maysa a magazine assembly para cal. .45; ken 7 bala para cal. .45. (Tawid News)