BANNER: Nagtambang tropa ti gobierno, nakasuan agsusukot a kaso

VIGAN CITY – Innem a kameng ti lokal a grupo dagiti rebelde a komunista ti napilaan iti agsusukot a kaso gapu iti pannakatambang dagiti tropa ti gobierno idi Pebrero 26 daytoy a tawen a nakatayan ti lima ken nakadunoran ti innem a kameng ti Philippine Army.
Napilaan iti opisina ti provincial prosecutor, Vigan City, Ilocos Sur iti 5 counts of murder, 6 counts of frustrated murder ken sumagmamano a counts of attempted murder da Franie Padaoil ti Brgy. Amtuangan, Tubo, Abra; Gamas-ao Macario ti Tubo, Abra; Joven Lamadao Cayasen ti Sitio. Licuan, Brgy. Amtuangan, Tubo, Abra; Mortar Sadaoan ti Brgy. Tabacda, Tubo, Abra; Ricky Tinong Taki ken Antonio Agustin Tabling, agpada a taga-Sitio Licuan, Brgy. Amtuangan, Tubo, Abra; ken Dexter Capuyan of La Trinidad Benguet.

Nairaman iti kaso dagiti sumagmamano a John Does ken Jane Does.

Nai-docket dagiti kaso iti babaen ti I-03-INV-15D-00175.

Maipalagip a lima a soldado ken innem ti nasugatan a kakaduada gapu iti panangtambang kadakuada ti mapattapatta a 30 a kameng ti Community Party of the Philippines/New Peoples’ Army/National Democratic Front (CNN) a pakaibilangan ti maysa nga Amasona, a nakaibilangan dagiti akusado idi sardam ti Pebrero 26 sadiay Kin Lourdes, Barangay Namitpit, Quirino, Ilocos Sur.

Nabigbig dagiti nagudas a soldado a da PFC Charlender Ramos, residente iti Tayabo San Jose City; PFC Jumarc Villanueva residente iti Fort Magsaysay, Nueva Ecija; CPL Janji Dela Cruz CPL Jan-Jie Dela Cruz, residente iti Cabanatuan City, Nueva Ecija; CPL Elmer Lacandile residente iti Zambales; ken PFC Gil Ocampo residente iti Nueva Vizcaya.

Nasugatan iti pannambang da Lt. Jerome Yosures, residente iti Labangan, Zamboanga del Sur; PFC Lester King Ancheta residente iti Aurora, Aurora.; PFC Jason Gongora residente Alicia, Isabela; PFC Danilo Pascua residente Cayapa, Nueva Ecija; PFC Rolando Olipas residente iti Guimba, Nueva Ecija; PFC Alvin Mariñas residente iti Sta.Rita, Cabangan, Zambales.

Naggapu ti komboy ti 81st IB, 7th ID, PA; Regional Public Safety Battalion 1(RPSBI); ken Ilocos Sur Provincial Public Safety Company (ISPPSC) iti Sitio Legleg, Quirino idi agarup 7:20 ti malem ti nadakamat a petsa ket sumangsang-at ti luganda a KM250 iti Cervantes idi pinaputokan ida dagiti grupo ti rebelde a komunista.

Sakbay daytoy nga insidente, idi Pebrero 19 daytoy a tawen, pinuoran dagiti masuspetsa a kameng ti NPA ti ekuipo ti minas ti South Ocean Mining Corporation sadiay Sitio Sinagaban, Patungcaleo, Quirino.

Idi Abril 11, 2014, pinuoran met dagiti mapapati a miembro ti NPA ti drilling machine ti Freeport Mc-Moran Phelps Dodge Mining Company sadiay Barangay Patiacan, Quirino.#