BANNER: Naun-uneg nga inbestigasion mainaig napuoran nga ekuipo ti gobierno probinsial, imbilin ni Gov. Singson

CABUGAO, Ilocos Sur – Imbilin ni Governor Ryan Singson ti naun-uneg a panagimbestiga ti Provincial Police Office mainaig iti naireport a napuoran nga ekuipo a kukua ti gobierno probinsial idi rabii ti Hunio 22.

Kinuna ni Singson a madama met ti panagimbestiga ti gobierno probinsial no apay nga adda ekuipo ti gobierno probinsial a maus-usar iti Cabugao a saan nga ammo ti gobernador.

Kinuna ni Singson a pinaayabanna ti drayber ti nasao nga ekuipo tapno maammuan no ania ti napasamak ken no ania a proyekto ti ar-aramidenna ta saan met a dimmalan iti opisinana.

Mapapati a maar-aramat ti nasao nga ekuipo iti pannaka-dredge iti karayan.

Kanaig daytoy, kinuna ni Singson a paimbentariona manen dagiti ekuipo ken luglugan ti gobierno probinsial tapno maammuan no ania a proyproyekto ti nakaipananda.

Innayonna a pabirbirokna met ti komunikasion no adda man kiddaw mainaig iti pannakaaramat ti nasao nga ekuipo.

“No adda man dredging, masapul a maammuantayo no ania ti rason a pinuoranda,” kinuna ni Singson.

Idi agsapa ti Hunio 23, mismo a ni Margaay Barangay Captain Joseph Simbe ti nangireport iti police station ditoy a napuoran ti backhoe a kukua ti provincial government a mapapati a naisayangkat idi rabii ti Hunio 22.

Iti inisial a panagimbestiga ti polis-Cabugao, Cabugao Bureau of Fire Prevention ken Keen Investigation Monitoring Action Team (KIMAT) ti Ilocos Sur Provincial Police Office, nakaparking ti buck hoe a nagmarka iti Hitachi a kukua ti provincial government iti igid ti karayan idi pinuoran dagiti di pay nabigbig a suspek.

Segun ken ni Cabugao Fire Marshal Acapuyan, makabulanen ti nasao nga ekuipo a maus-usar iti pannaka-dredge ti karayan iti nagbaetan ti Barangay Baclig ken Barangay Margaay.

Kinuna met ni Elmer Valorozo, operator ti nasao nga ekuipo, maar-aramat daytoy iti pannaka-dredge ti karayan ngem iti daydi a rabii, nabati ti ekuipo nga awan ti bantayna.

Kitkitaen dagiti inbestigador ti anggulo a nairanta a napuoran ti ekuipo agsipud ta malaksid dagiti rineppet a garami a naikabil iti sirok ti lugan, sabali laeng dagiti naiparabaw iti makina.

Saanen a mabalin nga aramaten ti ekuipo ti munisipio ditoy nga ili gapu ta nakaro ti pannakadadaelna.

Iti follow-up investigation dagiti polis, naammuan manipud ken ni Jennie Sajor y Sumibcay, 42, naasawaan, mannalon, ken residente iti nadakamat a barangay nga idi agarup 11:45 ti rabii ti Hunio 22, bayat ti panagturongna iti kataltalonan, nakitana ti gil-ayab ti apuy iti asideg ti igid ti karayan a puon ti nagtarayanna a naggawid gapu iti butengna.
Ni met laeng Sajor ti nangireport iti insidente ken ni Simbe a nangitimbre met iti kapolisan.#