Footer

BANNER NEWS: 12 mangngalap, naisadsad iti San Vicente

SAN VICENTE, Ilocos Sur -Nabirokanen  dagiti 12 a nabatbati pay a mapukpukaw a mangngalap manipud iti Agoo, La Union iti maysa a coastal barangay ti  San Vicente ditoy probinsia iti rabii ti Hunio 25 ditoy.

Ti dakkel a panagyamanda iti Namarsua ta nakalasatda amin nga agkakadua ti immuna a simngay a balikas dagiti mangngalap.

Kinuna ti maysa a mangngalap a no palabsenda pay ti maysa nga aldaw iti taaw, mabalin a natay iti bisin ken waw.

Nainaganan dagiti nakalasat a mangngalap a da Michael Garcia, Salvador Supsupen, Roberto Eslao, Amado Fangonilo, Fernan Hugo, Bobby Ofiana, Andy Domondon, Pepito Albay, Boy Estacio, Sixto Gualberto, Erwin Cachuela ken ti panguluenda ti grupo a ni  Nomer Garcia.

Naitaray ni Garcia, iti Gabriela Silang General Hospital iti Vigan City gapu iti napalaus a kapsutna.

Nupay kasta, rimmuar met laeng ti lakay kalpasan ti sumagmamano nga oras.

Iti dayta met laeng a rabii, naggawid dagiti mangngalap iti Agoo.

Segun ken ni Garcia, ruot ti baybay, kariskis ti kawayan ken tudo ti pinangpedpedda iti bisin ken wawda ken diken ti inkagayda iti bagida a pinangpukawda iti lamminda.

Kinunana nga adda nasaripatpatanda a bapor ngem saan nga immasideg kadakuada ken adda pay nagampayag nga eroplano ngem naglayon daytoy gapu ta mabalin a dida nakita ida nga agkatangkatang iti baybay.

Karaman dagiti nakalasat kadagiti 26 a napan nagkalap iti taaw a naglugan iti dua a bangka idi dimmuprak ni Bagyo Frank idi Domingo.

Sangapulo ket maysa a kakadua dagiti  mangngalap a mapukpukaw iti taaw iti iduduprak ni Bagyo  Frank ti nasarakan itay Hunio 24 iti Barangay Pilar, Ilocos Sur.

Idi masarakan dagiti mangngalap, nakapsutdan gapu iti kaawan ti naipauneg ken inumenda a danum iti dua nga aldaw ket kagudua a panagkatangkatangda iti taaw.

Nabigbig dagiti  mangngalap a simmanglad iti Pilar, Sta. Cruz, Ilocos Sur a da Jose Niñalga, 40; William Lagleva, 34; Mac-mac Celeste,22; Carlos Soriano,37; Edmund Hugo,40; Noel Rulloda,22; Vicente Ofiana,45; Carlos Ofiana,55; Benito Sarmiento,55; Paulino Sarmiento, 49; Rodel Bacalan, 49; agnaed amin iti San Julian West, Agoo, La Union.

Dua kadagiti immuna a nakalasat,  da Conrad Dacanay, 35 ken Roel Ofiana, 40, ti nagkuna a napattog ti bangkada idi sinabuagan ti dakkel a dalluyon.

Segun dagiti dua, saanda nga ammo nga adda bagyo idi agpataawda.

Maysa nga aldaw kalpasan ti pannakaireport ti panagpukaw dagiti mangngalap, tallo ti nasalbar a pakairamanan da Samson Callejo, 54; Sotero Supsupen, 56; and Willie Albay, 42.

Kabayatanna, agpiesta dagiti umili ti Agoo, La Union kas paset ti panagyamanda gapu iti milagro a pannakalasat dagiti 26 a mangngalap a napukaw iti taaw bayat ti iduduprak ni Bagyo Frank.#