BANNER NEWS: 2 baro a rangtay iti I. Sur, inaguraran ni GMA

BANTAY, Ilocos Sur – Pormal nga inaguraran ni Pres. Gloria Macapagal-Arroyo dagiti dua a baro a rangtay iti Barangay Banaoang ditoy nga ili ken iti Amburayan iti Tagudin, Ilocos Sur idi Disiembre 30, kagiddan ti pannakarambak ti Rizal Day ditoy probinsia.

Mismo nga immay ditoy probinsia ni Pres. Arroyo, kaduana da Department of Public Works and Highways Secretary Victor Domingo Deputy National Security Adviser Luis “Chavit” Singson, Ilocos Sur 1st District Cong. Ronald Singson, 2nd District Cong. Eric Singson, House Deputy Speaker Eric Singson ken Gov. Deogracias Victor “DV” Savellano iti pannakainagurar dagiti dua a rangtay a mamagkamang iti umuna ken maikadua a distrito ti Ilocos Sur ken iti La Union iti abagatan.

Nabara a sinabat dagiti municipal officials ti Bantay nga indauluan ni Mayor Sammy Parilla, Vice Mayor Popoy Peredo ken dagiti konsehal ken barangay officials ken iti Tagudin, Ilocos Sur nga indauluan ni Mayor Roque “Jun” Verzosa ken dagiti opisial ti munisipal ken barangay ti grupo ni Arroyo.

Immuna a linuktan ti Presidente ti Quirino Bridge nga agatiddog ti 456 a metro a nakabusbosan iti P625.614 milion sa nagturong iti Tagudin, Ilocos Sur a nangluktanna iti Amburayan Bridge nga agatiddog iti 535 a metro a napundoan iti P557 milion.

Nairugi a naipatakder dagiti dua a rangtay idi Agosto 23, 2007 ket naileppasda idi Disiembre 9, 2009.

Kinuna ti Presidente nga strategic a rangtay ti Quirino Bridge agsipud ta daytoy ti mamagkonektar iti umuna ken maikadua a distrito ti Ilocos Sur.

Dinayaw ni Arroyo dagiti dua a mangibagi iti distrito ti Ilocos Sur, ti deputy national security officer, dagiti opisial ti probinsia ken munisipal ti Banaoang ken Santa sana pinaayaban ti maysa nga empleado iti konstruksion ti rangtay, ken ni Jojo Gorospe, empleado iti gobierno munisipal ditoy tapno “maammuan ti intero a pagilian” ti kinapateg dagiti nabangon a rangtay iti probinsia.

Kinuna ti empleado iti konstruksion a dakkel ti naitulong iti panagtrabahoda iti rangtay iti panagbiagna ken ti pamiliana.

“Naparpardas…nataltalged ti panagbiahemi, nangruna kadakami a kanayon nga agbiahe iti ruar ti probinsiami, ” kinuna Gorospe, sana pinagyamanan ti Presidente iti pannakaipatakder ti Quirino Bridge.

Kabayatanna, kinuna ni Cong. Ronald Singson a kiniddawna iti Presidente ti pannakarehabilitar ti nasional a kalsada ti Ilocos Sur ket impanamnama ni DPWH Sec. Panganiban ti pannakaiprograma daytoy iti sumuno a tawen.

Segun ken ni Singson, idi pay la 1982 ti pannakaipasdek dagiti kalsada ken nalpasen ti rehabilitasion ti national highway iti Ilocos Norte ken La Union ket nabatin ti Ilocos Sur.

Iti sabali a bangir, pinagyamanan ni Gov. DV Savellano ti Presidente kadagitoy proyekto iti Ilocos Sur a mangipaay iti naan-annayas a panagdaliasat dagiti kaprobinsiaanna ken nadardaras a pannakaidanon dagiti serbisio kadagiti ili.

Walo a rangtay ti imbilin ni Pres. Arroyo a maipatakder iti rehion iti babaen ti programana nga Urgent Bridges Construction Project for Rural Development.#