BANNER NEWS: 2 lalaki tiniliw dagiti polis bayat panagpatayada iti hueteng

NARVACAN, Ilocos Sur – Kalpasan ti sumagmamano a bulan a panagsardengna, mapapati a nagungar manen ti hueteng  a mapapati a mabolbola iti sabali a probinsia kalpasan a natiliw ti tallo a lallaki nga agpatpataya iti hueteng iti dua nga ili ditoy probinsia itay agtapos ti bulan ti Oktubre.

Tiniliw dagiti polis da Samson Arcebal y Mustapha, 49, balo, ken residente iti Sitio Barikir, Barangay Dardarat, Cabugao, Ilocos Sur; ken ni Randy Cambe y Cabanilla, 40, balo, ken residente iti Barangay Tangadan, San Quintin, Abra bayat ti panagpatayada iti hueteng, maysa nga illegal a numbers game.

Segun iti polis, guerilla-style ti operasion daytoy illegal a numbers game no sadino a ditoy probinsia ti pagpatayaan dagiti kobrador sa mabola iti sabali a probinsia.

Tiniliw dagiti polis nga indauluan ni OIC, Police Chief Inspector William N. Nerona ni Arcebal nga agpatpataya iti hueteng kadagiti aglaklako iti mismo nga uneg ti Northern Ilocos Sur Trade Center iti Barangay Rizal, Cabugao.

Natiliw met ni Cambe bayat nga agkolkolekta iti pusta manipud kadagiti aglaklako iti tiendaan ti Narvacan babaen ti operasion nga insayangkat dagiti polis nga indauluan ni Police Inspector Ramil Mendioro babaen ti superbision ni Police Chief Inspector Joseph A. Fajardo.

Nakumpiska iti ikut ni Arcebal ti pusta nga agdagup iti P810 iti nadumaduma a denominasion, papelitos ken ballpen idinto a P450 met ti naala dagiti polis ken ni Cambe, malaksid laeng ti dua a ball pen, papelitos a nakaisuratan dagiti nadumaduma a number combinations.

Segun ken ni Arcebal, maipan dagiti pusta iti Badoc, Ilocos Norte. Kinuna met ni Cambe a maipan ti pusta a nakolektana iti San Quentin, Abra tapno ditoy a mailibas a mabola.

Nupay kasta, saan nga imbaga dagiti dua no sadino ti pakabolaanda wenno no asino dagiti operator wenno financier iti illegal a numbers game.

Immun-una ngem daytoy, tiniliw dagiti polis Cervantes iti panangidaulo ni Senior Police Officer 4 Fernando Quebral ni Marion Cruz y Pagaway, 35, naasawaan, ken residente iti Quirino Hill, Baguio City bayat ti panagkolektana iti pusta iti hueteng nga agdagup iti P1,350.00.

Nawayawayaan met laeng ni Cruz ngem naipila ti kaso a panaglabsing iti PD 1602 maikontra kenkuana idi Oktubre 23.

Napilaan metten da Cambe ken Arcebal iti kaso a panaglabsing iti PD 1602 iti provincial prosecutor’s office iti Vigan City.#