Footer

BANNER NEWS: 2 suspek iti panagtakaw, nagudas iti shootout kadagiti polis

SARRAT, Ilocos Norte – Dua nga aldaw kalpasan ti panagtakawda iti maysa a bodega ti softdrinks a nagtungpal iti pannakapapatay ti dua a police officers, nagudas bayat ti pannakipinnaltogda ti dua kadagiti uppat a suspek a naipiskot dagiti operatiba iti insayangkatda a pursuit operation iti Barangay 19 ditoy nga ili sakbay ti tengnga ti aldaw ti Hulio 5.

Nagudas dagiti suspek a da Justine Amugawen ken Albert Amugawen bayat ti pannakirangetda kadagiti nagtipon nga elemento ti Ilocos Norte Provincial Police Office, Sarrat Police Station, CIDT, RID ken R101 iti babaen ti direkta a superbision ni Police Senior Supt. Marlou C. Chan.

Inaresto met dagiti polis iti dayta met laeng nga operasion dagiti dua pay a suspek a nainaganan Jaime Macadangdang ken Arnel Bannacas.

Narekobre dagiti operatiba kadagiti suspek ti dua a caliber .45 pistol ken kuarta nga agdagup iti P59,545.00 ken napapateg nga alahas a paset ti tinakaw dagitoy iti Coca Cola storage building iti Barangay Lydia, Marcos, Ilocos Norte idi Hulio 3.

Saan pay a nainaganan ti maikalima a suspek a nangisayangkat iti panagtakaw iti Coca Cola storage building idi Hulio 3 a nangkayaskasanda iti P500,000.

Iti immun-una a report manipud iti PPO ditoy, apaman a naawat ti Marcos police station ti maysa a tawag a nangireport iti panagtakaw iti warehouse ti Coca Cola,  nagresponde da Police Insp. Naldo A. Aromin, officer in charge, SPO2 Danny M. Ballesteros  ken kakaduada a polis ket kinamatda dagiti suspek a naglibas iti kabambantayan a paset ti Sitio North Parola ti nasao a barangay.

Mapapati a sumungsungad pay laeng dagiti polis ngem pinaputokan ida dagiti suspek a nakatiruan ni Ballesteros. Nagpaut ti ranget iti 25 minutos a nagtungpal iti pannakagudas ni Aromin ken maysa a mapapati a kadua dagiti nagtakaw.

Nakarekobre dagiti polis manipud iti natay iti dua a backpacks a naglaon kadagiti assorted nga aruaten, alahas, petaka ken pouch a naglaon kadagiti sensilio nga agdagup iti  P2,000. sumagmamano a bills nga agdagup iti P1,280 a kuarta, maysa a homemade 12 gauge pistol ken Nokia a selpon.

Segun ken ni Chan, kameng dagiti suspek iti notorious a Gubiangan Group nga agisaysayangkat kadagiti robbery-hold-up iti Region 1, 2 ken Cordillera.#