BANNER NEWS: 25 paltog, naipaima iti polis-Cabugao para safekeeping

CABUGAO, Ilocos Sur – Nadumaduma a klase nga armas ti impaima dagiti politiko ken prominente a personalidad ditoy nga ili iti kapolisan para iti pannakaidulinda tapno maipasiguro ti safe and secure elections iti masungad a panagpipili inton Mayo 13 daytoy a tawen.

Naammuan ti Tawid News a duapulo ket lima a lisensiado a paltog a pakaibilangan dagiti 19 a pistol ken 6 long firearms ti impaima dagiti politiko ken municipal officials nga indauluan ni Mayor Edgardo S. Cobangbang, Jr., sumagmamano a barangay captains ken prominente a residente ditoy nga ili iti kapolisan tapno maidulinda agingga iti malpas ti eleksion ken aggibus ti election gun ban.

Mismo a da Police Chief Superintendent Ricardo C. Marquez, regional director ti Police Regional Office 1, Police Senior Superintendent Sterling Blanco, regional intelligence director, Police Senior Superintendent Dennis L. Basngi, acting provincial director iti Ilocos Sur Police Provincial Office, ken Mayor  Cobangbang, ti nangputipot iti masking tape iti bunganga dagiti paltog ken pannakapirmada sakbay ti pannakaidulinda for safekeeping iti police station.

Karaman kadagiti agtuturay ditoy nga ili a nangideposito iti lisensiado a paltogda da Mayor Cobangbang, Vice Mayor Danny Gazmen, dagiti sumagmamano a barangay kapitan ditoy nga ili a pakaibilangan da Barangay Captain Danny Garcia, Ronel Zamora, Iliong Siruno, Ruben Siruno ken da Dante Morales ken Mike Briones.

Initiatibo ti kapolisan ditoy nga ili babaen ti panangidaulo ni Police Chief Inspector William Nerona, hepe ti polis, daytoy a gannuat ket naaramid ti pannakabusal ti muzzle dagiti paltog babaen ti simple a seremonia a naangay iti Cabugao Cultural and Sports Complex, Barangay Rizal ditoy idi Abril 17 nga inimatangan pay ni Major Eugene M. Mucoy, executive officer ti 51st IB, Philippine Army a nangibagi ken ni Lieut. Col. Desiderio Alava; Rev. Fr. Felix Costales, kura paroko ti St. Mark the Evangelist Parish Church; Comelec Officer Marivic Castañeda, MLGO Connie Quiñola,  dagiti municipal councilors, dagiti barangay captains nga indauluan ni ABC President Teddy U. Soller, ken dagiti nadumaduma a sektor a pakaibilangan ti PPRCV nga imbagian ni Benjamin Castillo.

Kanaig daytoy, dinayaw ni Marquez daytoy a gannuat nga ibilangna a “milestone” iti pakasaritaan ti Cabugao sana innayon a mismo nga immay ditoy nga ili tapno idanonna ti apresasionna kadagiti gun owners a “kolektibo nga immannugot a mangideposito kadagiti armasda iti kapolisan ti Cabugao.

Sinaluduan ti regional director dagiti agtagikua kadagiti paltog gapu iti daytoy “noble gesture” a panangitalekda kadagiti paltogda iti kapolisan para iti safekeeping agingga iti malpas ti eleksion tapno masigurado a saan a maaramat dagitoy iti aniaman a kinadamsak iti masungad a panagpipili.

“Responsibilidad ti maysa a gun owner ti pannakaammo a ti panagiggem iti paltog ken maysa met laeng a pribiliheo, saan ketdi a maysa laeng nga ordinario a banag, isu nga impakitami… a responsiblekami met nga agtuturay,” kinuna ni Cobangbang.

Innayon ni Cobangbang a a sisusuporta iti daytoy a gannuat ti kapolisan ti Cabugao nangnangruna ita a terminona nga agserserbi agsipud ta padapadada amin a mangtuntonton ti pannakapaadda ken pannakamentener iti nalinak ken natalna nga eleksion iti ilida.

Kinuna met ni Municipal Comelec Officer Marivic Castañeda a “nagpintas a pakasaritaan ti Cabugao, Ilocos Sur” ti pannakaipaima dagiti paltog iti kapolisan tapno masigurado ti nadalus ken naseguridad nga eleksion idinto a kinablaawanna dagiti polis ditoy nga ili iti panangidaulo ni Nerona gapu iti daytoy a gannuatna.

Sakbay daytoy, dua a barangay captain ti nangisuko kadagiti lisensiado a paltogda  iti polis ditoy para iti safekeeping a pakaibilangan da Barangay Captain James S. Sera iti Margaay, ken Barangay Captain Eliseo R. Serrano ti Salomague.#acco traders for tax evasion