Footer

BANNER NEWS: 26,500 tattao, 125 a barangay, sinaplit ti Bagyo Karen: pakauna a report ti PDCC

VIGAN CITY – Dua ti naireport a natay idinto nga agdagup iti 7,655 a pamilia a pakaibilangan ti 26,416 a residente iti 125 a barbarangay iti probinsia ti naapektaran iti panangsaplit ni Bagyo Karen iti Ilocos Sur itay Agosto 19-20.

Segun iti Provincial Disaster Coordinating Council, iti pakpakauna a report a naawat ti Provincial Social Welfare and Development Office manipud kadagiti nadumaduma nga il-ili, kakaruan ti naapektaran ti ili ti Sta. Maria gapu iti pannakalayus  ti 20 a barangay a nakadidigraan ti 2000 a pamilia; ti Sta. Lucia, 12 barangays ken 1,611 pamilia; ti Santa, 10 barangay ken 937 pamilia; ken ti Caoayan, 10 barangay ken 464 pamilia; San Esteban, 9 barangays ken 400 pamilia; ken Sta. Catalina, 9 barangays, 250 pamilia.

Uppat a tao ti naireport a nalmes ken mapukpukaw gapu iti pannakaiyanudda iti napigsa nga agus.

Iti Aragan, Cabugao, naiyagus ni Jose Tabia, 42, bayat ti panagballasiwna iti karayan idi Agosto 20. Narekobre ti bangkayna iti igid ti karayan ti Alinaay, Cabugao.

Iti Bique-walin, Lidlidda, naiyanud ni Gladys Buis, 13, idi mapanda iyalis dagiti tarakenda a kalding iti nangatngato a disso. Nairaman a naiyagus ti inana, ni Leticia, ngem nakapaigid.

Di pay nabirokan ti balasitang.

Dua pay a residente iti Barangay Rancho, Santa, Ilocos Sur, da Raymund Ancheta, 18, ken Agripino Cabalar, 22, ti naireport a naiyanud iti agos idi ballasiwenda ti karayan.

Segun iti report, mapan koma umuraga dagiti dua iti karne ti nalmes a dingnguen.

Gapu iti nagpatnag a panagindurog ti tudo iti rabii ti Agosto 19, nagreggaay ti bantay iti asideg ti Girl Scout building iti Banaoang, Bantay, Ilocos Sur a nakatrapikan dagiti agbiahe a lugan. Naiwalin dagiti pitak ken bato a naigampor iti kalsada ket nakabiahe met laeng dagiti lugan.

Ngem imbilin ni Bokal Gerardo Lahoz ti pannakaserra ti trapiko iti nasao a lugar iti agpatnag  gapu iti peggad nga itden ti landslide.

“Kasayaatan a maserraan ti trapiko, satayonto kitaen ti situasion inton lumawag,” kinuna ni Lahoz.

Iti parbangon, nagrissod manen dagiti pitak ken bato a dandani nakagaboran ti maysa a patrol car ken sumagmamano a lugan.

Nawayaan met laeng ti dalan kalpasan ti sumagmamano nga oras.

Iti Vigan City, nagpatnag da Mayor Eva Marie S. Medina ken dadduma a dadaulo a nangmonitor iti panagdinakkel  iti karayan Mestizo ken nagibakuit kadagiti naapektaran a residente.

Segun iti mayora, naibakuit dagiti agnaed iti Shelterville  iti San Julian Elementary School sada naiyalis iti gym gapu ta saanda a makaanay iti pagadalan.

Kinunana a nasapa nga  indagadagna ti yaalis dagiti agnaed iti Barangay 2 ngem  dida kayat a maiyadayo iti pagtaenganda ket sada la nagdisnudo a pumanaw idi makitada nga agdinakkelen ti karayan.

Nagpakni dagiti agnaed iti Pagpandayan iti pagbasketbolan, dagiti residente iti Barangay IX, iti covered court ken iti gymasium iti terminal dagiti dyip ken bus ket uray dagiti agnaed iti Barangay Beddeng, nagbakuitda iti barangay hall ta nangato ti lugar.

Kinuna ni Medina nga adda in-assignna nga aggian iti city hall tapno mamonitor ti sasaaden dagiti barangay ti siudad.

Kabayatanna, impakaammo ni Mayor Christian Purisima a 375 a households ti apektado iti layus iti ilina. Segun iti mayor, 4 a baka ken teksas a manok ti maysa nga opisial ti nalmes.

Naipusing ti Barangay Dammay ken Uribi iti Santa gapu iti panagdinakkel ti karayan, idinto a nalayus ti sumagmamano a barangay iti Sinait a pakairamanan ti Katipunan ken Sabangan ken iti Barangay Villa Hermosa iti Sta. Cruz.

Sangapulo a pagtaengan ti totally a nadadael ken 6 a partially damaged iti Caoayan, Ilocos Sur. Naireport met a nalayus ti sumagmamano a nababa a barangay a pakairamanan dagiti barangay ti Callaguip, Baggoc, Pandan, Fuerte, Pantay-Tamurong, Nansuagao, paset ti Villamar ken paset ti Poblacion.

Naipadamag pay a nagkarayan dagiti kataltalonan iti Barangay Taleb ken Naguiddayan, Bantay a mapapati a gapu iti maipaspasdek a proyekto iti irigasion.

Dagiti sumaganad dagiti pakpakauna a report dagiti barangay ken pamilia a naapektaran iti bagyo: San Ildefonso – 15 barangays, 375 pamilia; Santa – 10, 937; San Vicente – 7, 173; Sinait –                          7,  230; Sta. Maria – 20, 2000; Sta. Cruz – 2, 500; Sto. Domingo – 4, 156; Caoayan – 10,  464; Sta. Lucia – 12, 1611; San Juan –  4, 131; Vigan – 5, 303; Santiago – 3, 75; Bantay – 8; San Esteban – 9,  400; Sta. Catalina  – 9, 250.

Segun iti PDCC, umad-adu pay ti bilang dagiti naapektaran a barangay ken pamilia gapu iti bagyo Karen no sumangpet dagiti report manipud kadagiti dadduma pay nga ili a pakairamanan dagiti upland municipalities.#