BANNER NEWS: 3 lugan nagkarambola, 17 tattao nasugatan

BANTAY, Ilocos Sur – Tallo a lugan ti nainbolbar iti aksidente iti national highway sadiay Barangay Dan-ar ditoy nga ili a nakasugsugatan ti sangapulo ket pito a tattao idi malem ti Septiembre 19.

Iti report a dimmanon iti provincial police office ditoy, napasamak ti aksidente idi agarup alas 4:00 ti agsapa ti Septiembre 19, ket nainbolbar ti Holy Family Bus a minaneho ni Ike Enojo y Amparado, 42, naasawaan, ken residente iti 81 Sta Cruz, Sta Maria, Bulacan; Isuzu tanker, a minaneho ni Romulo Pundogar y Gaerlan, 43, , residente iti Barangay Panicsican, San Juan, La Union; ken Dominion Bus, a minaneho ni Daniel Mangay-ayam y Metiong, 32, naasawaan, ken residente iti Bagong Silang, Caloocan City.

Naammuan iti panagimbestiga dagiti polis nga agpaamianan ti Holy Family Bus ket idi makadanon iti Barangay Dan-ar, impaigid ni Enojo ti bus iti abaga ti kalsada gapu ta maysa a pasahero ti mapapati a nagkiddaw nga umisbo.

Iti dayta a kanito, obertekan koma ti Izusu tanker ti bus ngem nagpreno agsipud ta makasabatna ti maysa nga atiddog a behikulo a nagkarga iti heavy equipment ket nagsubli iti orihinal a liniana iti likudan ti Holy Family Bus.

Mapapati a pinadas ti drayber ti Dominion Bus Line a lisian ti sarsarunuenna a tanker babaen ti panagpakannigidna ngem gapu ta nakitana ti sumungad nga atiddog a behikulo, nagsubli iti liniana ngem mapapati a nadungparna ti kutit ti tanker a nakaigapuan ti pannakaidungparna iti makannigid a kutit ti Holy Family Bus.

Kas resulta, nagsagrap iti dunor iti ulo ken paset ti bagida ti drayber ti Dominion a ni Mangay-ayam ken ti konduktorna a ni Karl Gonzales Padilla, residente iti Barangay Sagayaden, San Fernando City, La Union ken dagiti pasahero a pakaibilangan da Morado Roosebelt Lagma, San Juan, Abra; Grace Andallo Batoon, Biliney Abra; Maria Consuelo Buenavidez,  Manabo Abra; Rowell Quemado Dumlao, Tayum, Abra; Julio Ignacio y dela Cruz, Marilao, Bulacan; Adelina Sarmiento Villamor, Marilao, Bulacan; Danilo Pascua y Pataray, Payatas, Quezon City; Susana Magulod Pataray,  Payatas, Quezon City; Gloria Viado y Pataray, Bangued, Abra; Archie Pataray y Mocus, Tayum, Abra; Mark Layao Bagnalin, Lagayan, Abra; Rodrigo Querido Ortiz,   Lagayan, Abra;  Pido Cresencia Quemado, Dancuas, Abra; Enrique Barieto Saldenia,  Bangued, Abra ken Ritche Boy Querido y Ortiz, Pasig, Metro Manila.

Naitaray amin dagiti nasugatan iti Candon General Hospital para iti pannakaagasda.

Saan a naan-ano ti drayber ti Izusu tanker.

Nagsagrap iti nakaro a dadael dagiti lugan a nainbolbar iti aksidente.#