BANNER NEWS: 4 lallaki, 2 babbai nakasuan illegal panagkalap iti fish sanctuary

STA. MARIA, Ilocos Sur – Iti baet ti pannakaiparit ti panagkalap babaen ti bongbong, innem a tattao a pakairamanan ti dua a babbai ti kinasuan dagiti otoridad gapu iti illegal a panagkalapda iti fish sanctuary iti kabaybayan a sakup daytoy nga ili.

Naipatuloden iti provincial fiscal’s office ti kaso a panaglabsing iti paragraph 4 ti Section 88 ti RA 8550 maikontra kada Namnama Cabotage y Santiago, 36, naasawaan, fish vendor ken residente iti Barangay Lingsat, Sta. Maria, Ilocos Sur; Eric Cabotage y Cabaong, 38, naasawaan, fish vendor, ken residente met laeng iti Barangay Lingsat; Emilie Daproza y Daproza, 35, naasawaan, fish vendor, ken residente iti Barangay Lingsat; Samuel Daproza y Diga, 40, naasawaan ken residente iti Barangay Lingsat met laeng; Benjamin Dumot y Degracia, 50, ken residente iti Barangay Nalvo ditoy met laeng nga ili; ken maysa a Rogelio Canaoay y Quitoriano, agpada a residente iti Brgy. Nalvo, Sta. Maria, Ilocos Sur.

Maysa a report ti naawat ti polis ditoy nga adda naisayangkat nga illegal a panagkalap babaen ti dinamita iti fish sanctuary a masarakan iti Sitio Balangen, Barangay Suso ditoy nga ili idi agarup 11:50 ti bigat ti Mayo 13.

Nagresponde dagiti polis nga indauluan ni Police Senior Inspector Reynaldo Carrido Mendoza, Jr., OIC, kaduada ni Madeline Bongolan, AT/Fishery coordinator ket nagturongda iti nadakamat a lugar.

Nakasukal dagiti polis kadagiti lames a mapattapatta nga agdagsen iti 30 kilos a naikabil iti styrofoam box a kukua ni Namnama Cabotage y Santiago a naikarga iti traysikel a minaneho ni Eric Cabotage, 38, naasawaan, fish vendor, ken residente met laeng iti Barangay Lingsat.

Sabali laeng ti nasukalanda nga styrofoam box a naglaon met iti ikan a mapattapatta nga agdagsen iti sumurok-kumurang 30 kilos a kukua ni Emilie Daproza y Daproza, 35, naasawaan, fish vendor, ken residente iti Barangay Lingsat. Naikarga ti box iti Honda TMX 155 a tricycle a minaneho ni Samuel Daproza y Diga, 40, naasawaan ken residente iti Barangay Lingsat met laeng.

Mapapati a kinontak ni Benjamin Dumot dagiti dua a fish vendor.

Karaman pay dagiti tiniliw dagiti polis da Jonathan Gaoat y Ayson, 23, baro; Dionisio Gaoat y Espanto, 52, naasawaan; ken Erwin Corpuz y Palonzo, 38, naasawaan, agpapada a residente iti Barangay San Pablo, San Esteban, gapu iti panagkalapda iti fish sanctuary.

Kinumpiska dagiti polis dagiti fishing paraphernalia iti ikut dagiti mangngalap.

Segun ken ni Benedicto Saraos, provincial regulatory officer, provincial agriculture office, Vigan City, nakalap dagiti ikan babaen ti bongbong.

Kabayatanna, naruk-atan da Jonathan Gaoat y Ayson, Erwin Corpuz y Palonzo ken Dionisio Gaoat y Espanto, agpapada a residente iti Brgy. San Pablo, San Esteban, Ilocos Sur, kalpasan ti panagbayadda iti multada.#