BANNER NEWS: 40 high powered firearms, indatag dagiti opisial ti Abra iti PNP Chief

BANGUED, Abra – Uppat a pulo a nangangato ti kalidadda nga armas ti boluntario nga indatag dagiti opisial ti probinsia, munisipio ken barangay ditoy a probinsia bayat ti panagbisita ti hepe ti Philippine National Police ditoy idi Hulio 17.

Mismo a ni PNP Director General Nicanor Bartolome, Jr. ti nangimatang iti panangidatag dagiti provincial, municipal ken barangay officials  iti panangidaulo ni Governor Eustaquio Bersamin, Vice Governor Rolando Somera, ken dati a Congresswoman Cecilia Luna,  La Paz Mayor Joseph Sto. Niño Bernos, ken Bangued Mayor Ryan Luna kadagiti nadumaduma ti klasena a paltog iti turnover ceremony a naangay iti Magiting Hall, Camp Juan Villamor ditoy iti dayta nga aldaw.

Karaman pay kadagiti nagidatag iti armasda para safekeeping ti PNP Abra da San Juan Mayor Marco Bautista, Baay-Licuan Mayor Christopher Millare,  Lagangilang Mayor Patrocinio Abaya,  Malibcong Mayor Benido Bacuyag, Lacub Mayor Jun Baroña, Tineg Mayor Edwin Crisologo Sr. of Tineg, Boliney Mayor Ronaldo Balao-as, Dolores Mayor Robert Victor Seares, Langiden Mayor  Noel Castillo, dati a a mayor ti Bangued ngem Barangay Captain itan Dominic Valera, Barangay Captain Jendricks Luna ken dadduma pay nga opisial .

Agdagup amin iti 40 dagiti naidatag nga armas a pakaibilangan ti AK-47, baby armalite, cal. 45, armalite galil, shotgun, garand rifle, carbine, caliber 30 machine gun ken dadduma pay.

Pito a nadumaduma a paltog ti indatag nga armas ni Mayor Bernos,  5 a paltog ken ni Mayor Luna idinto a sag-3 a paltog ken ni dati a Cong. Luna ken sabali pay nga anakna a ni Jendricks Luna.

Sagdudua nga rifle ti indatag da Bersamin ken Somera.

Kinuna ni Cordillera Police Director Benjamin Magalong nga iti pannakaidatag dagiti high-powered firearms para iti safekeeping ti polis, malapdan ti panagpipinnatay ditoy a probinsia a kas iti napasamak iti kallabes.

Innayon ni Magalong a maikkan iti dua a police escorts dagiti nagidatag kadagiti paltogda para iti seguridad ken proteksionda.

Maidulin iti ikut ti PNP Abra dagiti nasao nga armas ket sadanto laeng maisubli kalpasan ti eleksion inton 2013 tapno masigurado ti natalna a panagpipili iti Abra.

Kas panagtungpal iti pammilin manipud ken ni Presidente Benigno Aquino, imbilin ni Bartolome ti naing-inget pay a crackdown kadagiti partisan armed groups (PAGS) a maaramat a pangriribuk ken pammutbuteng ken pammapatay iti eleksion inton 2013.

Ti Abra ti maysa kadagiti napudot iti politika kadagiti kallabes nga eleksion iti pagilian.#