BANNER NEWS: 41 paltog, droga, ginasut a bala, nakumpiska bayat ti search operations

CAMP BGEN OSCAR M FLORENDO – Pinullo a nadumaduma ti klaseda a paltog, ginasut a balbala ken aganay dua kilos a mapapati a maiparparit a droga ti nakumpiska dagiti police elements sadiay Sta. Rosa, Laguna idi Septiembre 18, daytoy ti inwaragawag ti police regional director ditoy itay nabiit.

Kinuna ni PRO1 Director Chief Supt. Roman A. Felix nga inaresto dagiti nagtitipon nga elemento ti intelligence, investigation ken legal division ti PRO1, a pakaibilangan ti CIDG-NHQ, Criminal Investigation ken Detection Unit ti PRO-4A ken PNP Special Action Force da George Fajardo aka Lorenzo Fajardo, 60, ken Ricardo de Rueda, Jr. 48, kalpasan a positibo ti panagsukisokda iti pagtaengan dagitoy sadiay Barangay Macabling, Sta. Rosa, Laguna idi agarup alas 3:00 ti bigat ti Septiembre 18 a nagresulta iti pannakakumpiskada iti 41 a nadumaduma ti klaseda a paltog, ginasut a balbala ken mapattapatta nga aganay 2 kilos a mapapati a shabu, bullet proof vests, sumagmamano a firearm bags ken holsters.

Innaganan pay ni Felix dagiti dadduma a naaresto iti operasion a da Estrella L. Lueles, 53, residente iti Barangay Macabling, Sta. Rosa, Laguna; Pablo Javier ti Barangay Biclat, San Miguel, Bulacan ken Nolito Garfil, 43, ti Morsia, Bacolod City.

Kinuna ni Felix a dua a search warrants nga inyisio ni Judge Thelma Bunye-Medina ti Regional Trial Court Branch 32, Manila ti imet dagiti nagtitipon nga operatiba idi insayangkatda ti panagsukisok iti pagtaengan dagiti suspek.

Naipan dagiti nakumpiska nga ebidensia ken dagiti naaresto iti CIDG-NHQ, Camp Crame, Quezon City para iti dokumentasion ken pannakaisagana dagiti maitutop a kaso maikontra kadakuada.

Kinuna ti regional director a resulta ti agtultuloy nga intelligence ken follow-up operations ti panagballigi ti operasion kas paset ti napingpinget a police operations ken kas suporta iti Firearms Control Program ti PNP.

Innayon ni Felix a nangato ti namnamana ken optimisko a babaen ti maipakat a cross-matching examination kadagiti nakumpisa a paltog ket mangipaay kadagiti kasapulan unay nga ebidensia para iti naan-anay a pannakasolbar dagiti insidente ti pammaltog iti Rehion I, a mangited iti hustisia kadagiti biktima ken pamiliada.#