BANNER NEWS: 5 kameng ti Budol-Budol Gang naapput iti Sudipen checkpoint

SUDIPEN, La Union – Lima a kameng ti Budol-Budol Gang ti natiliw iti checkpoint nga impasdek ti kapolisan ditoy nga ili apaman a nakaawatda iti impormasion a lumabas dagiti suspek iti hurisdiksionda kalpasan nga intarayda ti kuarta ken alahas ti nabiktimada iti maysa a retirado nga empleado iti gobierno.

Kinuna ni Police Inspector Jose Bingayan, hepe ti Sudipen police station a maisagsaganan ti kaso maikontra kadagiti tiniliwda a kameng ti Budol-Budol Gang a pakaibilangan ti uppat a babbai ken ti maysa a lalaki nga isu pay ti nagmaneho iti asul a Nissan, Box Type, nga inaramatda a getaway vehicle kalpasan a nabiktimada ni Delia Cablayan Dauz, 74, naasawaan, retirado a government employee, ken residente iti Barangay Becquez, Tagudin, Ilocos Sur.

Nabigbig dagiti suspek a da Lolita Jenese y Delos Reyes, 58, balo ken residente iti Tiblong, San Fabian, Pangasinan; Racquel Dela Cruz y Rimando, 36, naasawaan ken residente iti Pag-asa, Cabanatuan City, Nueva Ecija; Rowena Jenese y Valdez, 41, naasawaan ken residente iti Bitas, Cabanatuan City, Nueva Ecija; Glorie May Rimando y Jenese, awanan asawa ken residente iti Pandan, Alaminos, Pangasinan; ken ni Quirino Domingo y Pacada, 64, ken residente iti B3 L5 Garden Village, Pulong Buhangin, Sta. Maria, Bulacan.

Segun ken ni Bingayan, positibo a binigbig ni Dauz dagiti lima a suspek a nangballaibo kenkuana idi Enero 9 ken nangitaray iti alahas ken kuartana.

Narekobre dagiti polis ti P400,000.00 nga inyaon ti biktima iti maysa a bangko sadiay Candon City ken dagiti alahasna a pakairamanan ti wedding ring ken bracelet iti uneg ti lugan dagiti suspek.

Nakakumpiskada pay manipud iti lugan kadagiti peke nga alahas a mapapati nga ar-aramaten dagiti suspek a pangliwliw iti biktimaenda.

Kinuna ni Bingayan a bayat ti kaadda ni Dauz iti San Fernando City, La Union, ginayyem dagiti suspek ket imbagada a negosianteda ken agbirbirokda iti kasosioda iti negosio.

Babaen ti natagapulotan a panagbalbalikasda, naguyugoyda ti baket a mangisosio iti kuartana ket nagkukuyogda a dimmagas iti balay ti biktima iti Barangay Becques, Tagudin, Ilocos Sur a nangalaanna iti kuartana ken alahas ken iti libreta ti depositona iti bangko, kas sosiona iti negosio

Manipud iti Tagudin, nagturong ti grupo iti maysa a bangko iti Candon City no sadino nga inyaon ni Dauz ti depositona a P400,000.00.

Kinuna ni Bingayan nga idi naiyaon ni Dauz ti kuarta, intedna kadagiti suspek idinto nga imbati dagitoy ti bay-on nga impakilapda a naggianan dagiti rineppet a kuarta sada imbaga iti baket nga aguray iti maysa a fast food a panganan iti met laeng Candon City ta adda pay sabali a papananda.

Naguray ni Dauz iti naituding a pagkikitaanda ngem saannan a nauray dagiti kinatulagna.

Naduktalanna laengen a narugrugos a rineppet a papel ti linaon ti bag nga imbati dagiti suspek.#