BANNER NEWS: 5 natiliw iti nagsasaganad a buy-bust, search operations

BANTAY, Ilocos Sur – Lima a tattao ti tiniliw dagiti nagtitipon nga elemento ti kapolisan bayat ti nagsasaruno a tallo nga aldaw a buy bust ken search operations nga insayangkatda iti Candon City, San Juan, ken ditoy nga ili itay nabiit.

Iti Candon City, idi agarup alas 4:00 ti malem ti Agosto 26, nangiwayat iti buy bust operation dagiti nagtitipon nga operatiba ti Candon City police station, Sta. Cruz police station ken PDEA INIS sadiay Barangay San Jose, Candon City a nagtungpal ti pannakaaresto da Robert Manzano y Pre, 44, naasawaan, ken residente iti Barangay Balingaoan, Candon City; ken ni April de Guzman y Batalero, 44, awanan asawa, ken residente iti Barangay San Jose, Candon.

Nakakumpiska dagiti polis kadagiti dua iti bassit a heat sealed plastic sachet a naglaon iti white crystalline substance a mapapati a shabu, 11 heat sealed plastic sachets a mapapati a nagkarga iti shabu, 5 nga empty plastic sachet a naglaon iti masuspetsa a shabu residue, maysa nga straw scoop a nagkarga iti mapapati a shabu, 2 elongated strip of foil nga addaan masuspetsa a shabu residue, 2 lighter, maysa a rolio ti foil, maysa a digital weighing scale, maysa nga Ericson cellphone ken P500.00 a naaramat a buy bust money.

Naipaiman ti kaso a panaglabsing iti RA 9165 maikontra kada Manzano ken de Guzman iti Candon City prosecutor’s office.

Iti sumuno nga aldaw, Agosto 27, iti agarup 7:45 ti malem, nangiwayat iti buy bust operation dagiti elemento ti kapolisan a pakaibilangan ti SPAIDSOTG, ti Ilocos Sur Police Provincial Office nga indauluan ni PCI Sosimo R. Racho, ken San Juan Police Station nga indauluan ni COP, Police Senior Inspector Edgardo T. Medrano, babaen ti direkta a superbision ni Acting Provincial Director, Ilocos Sur Provincial Police Office, Police Senior Supt. Nestor Eswagen Felix ken babaen ti koordinasion ti PDEA RO1 a nagresulta iti pannakatiliw ni Rene Gorospe y Rafanan, 24, baro, ken residente iti Barangay Bannuar.

Nakumpiska dagiti polis iti ikut ni Gorospe ti P1,000.00 a marked money a naaramat iti operasion, 2 small heat sealed plastic sachet a nagkarga iti mapapati a shabu, maysa nga asul a pouch a naglaon iti lighter, Nokia cellphone, P170.00, 2 a medium size heat sealed plastic sachet a nagkarga iti mapapati a nagango a bulong ti marihuana, maysa a medium size heat sealed transparent plastic sachet a nagkarga iti mapapati a shabu ken 2 a bala para iti cal. 36.

Iti pannakaisurat daytoy, naipababaenen ni Gorospe iti inquest proceeding iti provincial prosecutor’s office, Vigan City.

Kabayatanna, idi agarup 5:30 ti malem ti Agosto 28, dua a balay sadiay Barangay Taleb, Bantay ti naggiddan a sinukisok dagiti nagtitipon nga operatiba ti Bantay police station nga indauluan ni COP, PSI Andrew Rabang, Ilocos Sur Provincial Anti-Illegal Drug Special Operation Task Group (ISPAIDSOTG) nga indauluan ni PCI Sosimo R. Racho, Ilocos Sur Special Enforcement Team (ISSET), PDEA-RO1 nga indauluan ni Darnel Bacate ken PIB Ilocos Sur PPO, babaen met laeng iti direkta a superbision ni Acting Provincial Director Police Senior Supt. Nestor E. Felix.
Nakakumpiska dagiti polis iti balay ni Roberto Mariñas, Jr. y Fillon, 48, naasawaan, iti pito nga small heat-sealed transparent plastic sachets a nagkarga iti mapapati a shabu ken drug paraphernalia a pakaibilangan ti maysa a lighter ken aluminum foils nga addaan iti mapapati a shabu residues idinto nga uppat nga small heat-sealed transparent plastic sachets a nagkarga iti mapapati a shabu ken nakuppil nga aluminum foils iti balay ni Leo Frederick Caday y Garen, 38, naasawaan.

Imet dagiti polis ti search warrants nga inyisio ni Judge Marita Balloguing ti RTC Branch 20, Vigan City a napetsaan iti Agosto 27 idi napanda sinukisok ti balay da Mariñas ken Caday.

Iti pannakaisurat daytoy, maisagsaganan ti kaso maikontra kada Mariñas ken Caday.#