SAN FERNANDO CITY – Addan katapat dagiti riding in tandem a mangkamat kadakuada no agisayangkatda iti krimen. Daytoy kalpasan ti panagturpos dagiti napili a kameng ti Region 1 police iti Motorcycle Riding Course (MRC) itay nabiit.
Pitopulo ket pito a miembro ti Region 1 police ti immawat iti sertipiko ti panagturpos kalpasan a nakumpletoda ti 45-Day Motorcycle Riding Course (MRC) idi Agosto 22.
Ni Police Senior Superintendent Allan A. Parreño, Deputy Regional Director for Administration (DRDA) ti PRO1 ti naisangayan a sangaili iti panagturpos dagiti motorcycle riding cops.
Kinuna ni Parreño a maideploy dagiti nagturpos a miembro iti Motorized-Anti-Street Crime Operatives (MASCO) tapno tumulong iti naing-inget pay a kampania ti PRO1 kontra kriminalidad partikular iti pannakapugipog dagiti riding in tandem nga agisaysayangkat iti krimen.
Kinuna ni Parreño a dagiti kabarbaro a nagsanay a motorcycle riders ti makirupak kadagiti krimen nga isayangkat dagiti motorcycle riding criminals ken maiwayat dagiti pangsakbay nga aksion a panglapped kadagiti kriminal a mangbiktima kadagiti umili.
Indagadag ni Parreño kadagiti nagturpos ti panagbalinda a naturtured ken matalek a mangibaklay iti pagrebbenganda, uray ania dagiti pagpeggadan ken lapped iti dalan.
“No natalekkayo ken laklakaenyon ti lumagto iti uppat a kadapan iti kangato iti baet dagiti nakaro a risgo, siertoak a naaddaankayon iti kabaelan ken tured a mangkamat kadagiti dakes nga elemento ti sosiedad ken mangipasubo iti biagyo iti trabahoyo,” kinuna ni Parreño.
Kabayatanna, kinuna ni Senior Supt. Fortunato G. Guerrero, hepe ti Regional Highway Patrol Unit 1 (RHPU1) a maaramat dagiti nagturpos ti nasursuroda nga abante a tekniko ti panagpataray iti motorsiklo nangruna a maikontra kadagiti motorcycle-riding criminals.
Nagsanay iti las-ud ti 45 nga aldaw dagiti partisipante iti basic scientific motorcycle-riding techniques, umisu a riding posture, panagtalek iti panagpataray, panagpalagto, nawatiwat a panagpataray ken dagiti do’s ken don’ts iti big bike riding.
Nasursuro pay dagiti partisipante no kasano ti panangkontrol iti motorsiklo iti matutudo ken nagalis a situasion, ken ilalasat iti nakaro a trapiko, ken awareness kadagiti pagpeggadan.
Nangrugi ti klase idi Hunio 23 a nakipartisiparan dagiti 13 a Police Commissioned Officers (PCOs) ken 64 a Police Non-Commissioned Officers (PNCO) a naka-assigned kadagiti nadumaduma a police units iti Region 1.#
