BANNER NEWS: 8 sumangsango iti kaso iti panagminas, naaresto

SAN VICENTE, Ilocos Sur – Walo a tattao nga agpapada a residente iti Barangay San Sebastian ditoy nga ili ti inaresto dagiti polis babaen ti pammilin manipud iti korte ti Vigan City idi aldaw ti Agosto 5.

Inaresto ti kapolisan ti San Vicente babaen ti koordinasion ti barangay captain ti San Sebastian da Walter Riberal y Santos, Nestor Aquino y Rutab, Rolando Aquino y Rutab, Rodolfo Rabago y Reotutar, Alfredo Retreta y Rigunay, Dennis Lucero y Rualizo, Manuel Lorenzo y Bautista, ken Joseph Rigunay y Tuzon, residente amin iti Barangay San Sebastian, Ilocos Sur.

Sumangsango amin dagitoy iti panaglabsing iti Section 103 ti RA 7942 wenno Philippine Mining Act of 1995 iti sala ni Judge Gina Juan-Chan iti Regional Trial Court, Branch 21, Vigan City a nai-docket iti babaen ti CC No. 7446-V.

Nairekomenda nga agpiansa tunggal maysa iti P12,000.00.

Sagudayen ti nasao a linteg a no makedngan dagiti akusado, maibaludda manipud iti 6 a bulan agingga iti 6 a tawen wenno mapagmultada manpud iti P10,000.00 agingga iti P20,000.00 wenno isuda a dua, aniaman ti diskresion ti korte.

Daytoy ti maikadua gundaway nga adda naireport a natiliw gapu iti panagminas.

Idi Hulio 10, sangapulo ket uppat a tattao ti inaresto dagiti polis-Santa bayat iti akto a panagminasda iti Barangay Rancho, Santa, Ilocos Sur.

Agpapada a residente amin iti Barangay Puro, Caoayan, Ilocos Sur dagiti natiliwan nga agminminas a pakairamanan ti dua a menor de edad.

Nakasuanen dagiti natiliw iti kaso a panaglabsing iti RA 7076 wenno People’s Small-Scale Mining Act of 1991.

Natiliw dagiti small-time nga agminminas agarup makabulan kalpasan ti naangay a prayer-rally idi Hunio 22 iti Caoayan, Ilocos Sur nga indauluan dagiti papadi gapu iti mapapati a black sand mining iti probinsia.

Sakbayna, babaen ti pastoral letter, kinondenar ni Fr. Cosmenio Rosimo, numero uno a kritiko ni Gov. Ryan Singson, ti mapaspasamak a black sand mining iti probinsia, partikular iti Caoayan.

Ngem kinuna ni Singson a sipud pay nagtugaw a gobernador, nabatad ti pagtaktakderanna a saanna nga ipalubos nga adda panagminas iti black sand iti probinsia.

Iti met interbio ken ni Caoayan Mayor Germie Singson-Goulart, kinunana a maysa a proyekto ti lokal a gobierno nga idadauluanna ti pannaka-dredge ti Mestizo River agsipud ta silted daytoyen a pagamkanna a pakalayusan dagiti barangay iti asideg ti karayan iti panawen ti matutudo.

Ngem suspetsa ti kampo ni Fr. Rosimo a maaramat dagiti bapor a nagpondo iti kabaybayan iti asideg ti Barangay Poro para iti black sand mining.

Kanaig daytoy, imbatad ni Narvacan Mayor Zuriel Zaragoza ti oposision ti lokal a gobierno nga idadauluanna iti aplikasion ti eksplorasion ti maysa a mining company iti kabaybayan a sakup dagiti coastal barangays dagiti ili a pakairamanan ti Narvacan.

Kinuna ni Zaragoza a maysa a tourism area ti Narvacan ket saanna nga ipalubos ti panagminas ti nasao a kompania agsipud ta amkenna ti pannakadadael dagiti nagapuananda a mangitandudo iti turismo kadagiti coastal barangays ti ilina.

Indagadag met ni Bokal Anicka Zaragoza ti panangipasa ti sangguniang panlalawigan iti maysa nga ordinansa kas panangpatibker iti deklarasion ni Gov. Singson a saanna nga ipalubos ti black sand mining iti probinsia.#