BANNER NEWS: 9 drug pushers, naipalab-og nagsasaruno a buy bust operations ti kapolisan

VIGAN CITY – Siam a tattao ti natnag iti ima ti kapolisan itiĀ  insayangkatda a nagsasaganad nga operasion iti las-ud ti makalawas iti tallo nga ili ken dua a siudad iti probinsia kas paset ti napingpinget a kampaniada maikontra iti illegal a droga.

Uppat a masuspetsa a drug pushers iti Vigan City, dua iti Candon City, ken saggaysa iti Sta. Maria, Magsingal ken Bantay ti inaresto dagiti operatiba babaen ti insayangkatda a buy bust operations manipud idi Enero 17 agingga iti Enero 22.

Idi agarup alas 2:00 ti malem ti Enero 22, inaresto dagiti nagtitipon nga elemento ti Vigan City police station nga indauluan ni Police Inspector GlennĀ  Dulay, PAIDSOTG ken PDEA ISSET nga indauluan ni Agent Damel Bacate da Wilbert Ramos y Javier, 29, baro, ken residente iti Barangay Bulala Norte; Aniceta Bernardo y Altuna, 25, awanan asawa; Jesmael Arruejo y Reprima, 16, baro, agpada a residente iti Barangay Ayusan Norte; ken Atanacio Mike Piano y Forges, 18, naasawaan, ken residente iti Barangay Capangpangan, iti uneg ti maysa a marentaan a balay sadiay General Luna Street, Barangay IV, Vigan City.

Nakakumpiska dagiti polis iti ikut dagiti suspek iti sangapulo a heat sealed plastic sachet a naglaon iti mapapati a shabu, maysa a weighing scale, 3Ā  punggos ti plastic sachet, 6 lighters, sumagmamano a rolio ti aluminum foil, maysa a memory card ken P1,000.00 a naaramat a kasĀ  marked money.

Idi sardam ti Enero 21, maysa nga agnagan iti Renan Rebolteado y Lofredo, 31, baro, ken residente iti Shelterville, San Julian Norte, Vigan City ti impakatan dagiti polis ti PAIDSOTG ken PDEA ISSET ti Bantay Police Station iti buy bust operation iti Zone 6 a nagresulta iti pannakaarestona ken pannakakumpiska iti ikutna ti dua a heat sealed a plastic sachet a naglaon iti mapapati a shabu, disposable lighter, marked money a P500.00, maysa a P100.00, sensilio nga agdagup iti P17.00, Nokia cellphone, maysa a charger, improvised tooter ken dadduma pay a drug paraphernalia.

Plinano dagiti polis ti operasion kalpasan a nakaawatda iti impormasion a nakatuding nga agideliber ni Rebolteado iti droga iti Zone 6, Bantay ket nagpammarang ni SPO1 Laurence Sunico a kas poseur-buyer idinto a nagpuesto dagiti operatiba iti asideg ti pakaiwayatan ti transaksion.

Madamdama, simmangpet ti suspek ket inasitganna ni Sunico. Inruar ti suspek ti dua a plastic sachet manipud iti bulsana idinto nga inyawat met ti polis ti P500.00.

Dayta ti inur-uray dagiti aglemlemmeng a polis a gundaway ket dagusda a rimmuar sada inaresto ti suspek.

Idi aldaw ti Enero 20, nanabtuog met ni Dexter Pilor y Mislang, 33, naasawaan, ken residente iti Barangay San Basilio, Magsingal iti palab-og dagiti joint elements tiĀ  PDEAISSET, PAIDSOTG ken Magsingal Police Station nga indauluan ni SPO3 Gilberto A. Tolosa, inbestigador, ken nagpammarangan a PO1 Arthur Adversalo y Laungayan a kas poseur-buyer babaen ti tulong ti maysa a drug user a nagpaay a kas asset iti buy-bust operation.

Nakumpiska iti ikut ti suspek ti maysa a heat sealed plastic sachet a naglaon iti mapapati a shabu nga agdagsen iti sumurok kumurang .01 gram, P2,000.00 a pakairamanan ti P500.00 a marked money, ken Samsung cellular phone.

Naipaiman iti opisina ti Provincial Prosecutor, Vigan City ti rekord ti kaso a panagsalungasing iti RA 9165 maikontra ken ni Pilor.

Idi sardam ti Enero 17, insayangkat ti Santiago Police station iti panangidaulo ni PSI Roderick Vintero, OIC, iti babaen ti direkta a superbision ni Acting Provincial Director, PSSupt. Jemar Delgado Modequillo, ken iti koordinasion ti PDEA Region 1 ti maysa a buy-bust operation maikontra ken ni Jerwin Jimenez y Domingo, 38, baro, ken residente iti Barangay Poblacion Norte, Sta. Maria kalpasan a nakaawat ti kapolisan ti Santiago iti impormasion manipud iti BIN nga aglaklako daytoy iti droga iti las-ud ti lugar a responsibilidadda.

Maysa a civilian asset ti nagpammarang a gumatang iti droga ket idi madaman ti transaksion, dagus nga inaresto dagiti operatiba ni Jimenez ken panangkumpiskada iti ikutna ti maysa a heat sealed plastic sachet a naglaon iti mapapati a shabu, dua a P500.00, 2 a plastic sachet a naglaon iti mapapati a shabu a nginalngal ti suspek idi madama ti operasion, 7 a plastic sachet a mapapati a nagkarga iti shabu residue, 2 nga folded aluminum foil ken maysa a narolio nga aluminum foil, 2 a selpon.

Iti kaudian a report, naipilanĀ  iti opisina ti provincial prosecutor ti kaso ni Jimenez a panaglabsing iti RA 9165.

Kabayatanna, naiyendorso metten iti Opisina ti City Prosecutor ti kaso a panaglabsing iti RA 9165 maikontra kada Jojo Garrido y Clemente, 38, naasawaan, ken residente iti Barangay Patac East, Galimuyod, Ilocos Sur ken ni Nelie Bautista Tandoc, 26, awanan asawa, natibo iti Pilar Village, Las PiƱas City ken agdama a residente iti Barangay Calaoa-an, Candon City a napakatan iti buy bust operationiti Parloc road, Barangay Oaig Daya, Candon City idi agarup 11:00 ti aldaw ti Enero 17.

Karaman ni Garrido iti Provincial Level Target List ti PDEA.

Naaresto da Garrido ken Bautista babaen ti nagtipon nga elemento ti Candon City police station, PDEA-ISSET ken ICAG Ilocos Sur Chapter nga indauluan niĀ  PSupt. Richmond Laranang Tadina, OIC.

Nakumpiska dagiti operatiba iti ikut ni Garrido ti maysa a heat sealed transparent plastic sachet a mapapati a nagkarga iti shabu, maysa a Samsung cellular phone ken P3,180.00 iti nadumaduma a denominasion agraman ti 6 a P500.00 a marked money ken Kawasaki Fury motorcycle nga awanan iti registration plate.#