BANNER NEWS: Agannad panagpaputok iti panangsarabo iti Paskua, Baro a Tawen: ballaag ti BFP

CANDON CITY – Imballaag ti maysa nga opisial ti Bureau of Fire Protection ti panagannad dagiti revellers mainaig iti panagpaputok iti panangsaraboda iti Paskua ken Baro a Tawen ditoy siudad tapno maiyadayoda iti desgrasia.

Kinuna ni SFO Elpidio Galdones, agdama a deputy fire marshal ditoy, a rumbeng laeng a kitaen dagiti revellers ti seguridad iti panagaramat kadagiti paputok tapno maliklikan ti desgrasia ken uram.

Kanaig daytoy, kinuna ti fire marshall nga iti laeng Disiembre 24 ken 31 ti naituding a panaglako kadagiti paputok ken luses ditoy siudad, kasta met nga adda naituding a klase ti paputok ken luses a maipalubos a mailako.

Iti laeng Legazpi Street iti Barangay San Antonio ti mabalin a pagilakuan kadagiti paputok, kinuna ni Galdones.

Iti Magsingal, Ilocos Sur, imballaag ti fire marshall a matiliw dagiti illegal nga aglaklako iti paputok.

Kinuna ni BFP Marshall Bong Farinas a dagiti laeng pagtagilakuan nga adda permitda ti mapalubosan nga aglako iti paputok ket tiliwenda dagiti masukalanda nga illegal nga aglaklako.

Mangisaysayangkat ti BFP iti inspeksion iti tiendaan publiko tapno masigurado a dagiti laeng adda permitna a negosiante ti aglako iti rebentador, kuitis ken dadduma pay a paputok.

Naammuan nga adda naituding a lugar ditoy a paglakuan dagiti paputok manipud iti Disiembre 30 agingga iti Enero 1, 2010.

Kabayatanna, impakaammo ni Cabugao BFP Fire Marshall F04 Marlon Quebral a minitingnan dagiti naikkan permit nga aglako iti rebentador ken dadduma pay a paputok mainaig dagiti maipakat a safety measures tapno maliklikan ti uram.

Kinuna ni Quebral a naituding ti Cabugao Food Court a paglakuan iti paputok manipud iti Disiembre 30 agingga iti Baro a Tawen.

Iti met Vigan City, naituding ti bakante a lote iti abagatan ti gymnasium a pagparparkingan dagiti lugan a paglakuan kadagiti paputok tapno maliklikan ti pannakapasamak ti uram ditoy a siudad idi kassagpat ti New Year iti daytoy a tawen.

Natay ti maysa a negosiante iti pannakauram ti pagtaenganna gapu ti mapapati a panagpabettak ti maysa a reveller iti kuitis a nagturong kadagiti tagilako a paputok a puon ti uram.#