BANNER NEWS: Agkabsat a Singson, 5 pay, napilaan iti disqualification case

VIGAN CITY – Makalawas sakbay ti panagpipili inton Mayo 13, 2013, pinilaan ti kampo ti maysa a gubernatorial bet iti Ilocos Sur iti disqualification case ti kabalubalna iti kina-gobernador, ti kabsat daytoy a kandidato para congressman, ken lima pay a kandidato gapu iti mapapati a panaggatangda iti butos iti maysa a pasken sadiay Sto. Domingo, Ilocos Sur.

Nangipila iti Commission on Elections ni Tagudin Mayor Roque Verzosa, Jr., kandidato para gobernador iti Ilocos Sur,  iti kaso a mangdiskualipa iti kabalubalna iti nasao a puesto a ni Congressman Ryan Luis Singson, First Congressional District candidate Ronald Singson, Vice Governor Deogracias Victor Savellano ken dadduma pay a kandidato gapu iti mapapati a panaggatangda iti butos bayat ti piesta iti maysa a barangay iti Sto. Domingo, Ilocos Sur.

Mapapati a nangted ti grupo ni Singson iti P20,000.00  idinto a consolation prizes ti maipagarup nga inted dagiti municipal officials ket daytoy ti naiparipa bayat ti grand finals iti maysa a pasalip iti talento sadiay Barangay Nalasin idi Abril 22.

Mapapati a napagbitla pay dagiti kandidato iti sanguanan ti tallaong.

Adda mapapati a video a naala bayat ti nasao a pasken.

Ngem kinuna ni Cong. Singson a “black propaganda” ti naipila a disqualification case maikontra kenkuana.

Iti interbio kenkuana ti lokal a media bayat ti panagkampania ti Team Ryan iti Tagudin, maibilang a baluarte ni Verzosa, tinagibassit ni Singson ti kaso maikontra  kenkuana a kinunana a “desperate move” ti maysa a  kandidato nga ammonan nga awan ti panangabakna iti masungad nga eleksion.

Kinuna ni Singson a kasla shotgun dagiti kaso nga ipilpila ni Verzosa bareng adda matiruan.

Kinuna pay ni Singson a kasungani ti alegasion ti kasupangetna iti politika, saan a nakapan iti Barangay Nalasin iti daydi a rabii.

Binueltaan ni Singson ni Verzosa iti ikamkampania daytoy a “wayawaya iti Ilocos Sur” idinto nga pinalagidanna nga awan ti wayawaya iti ili a Tagudin agsipud ta saan a mapalubosan dagiti barangay captains iti Tagudin a mapan agkiddaw iti tulong iti kapitolio wenno kadagiti congressman.

Immun-una ngem daytoy, pinilaan met ni Atty. Bertrand Baterina iti disqualification case ni dati a Congressman Ronald Singson gapu ta nakonbiktaran iti panagikut iti droga iti maysa a korte sadiay Hong Kong idi 2011.

Segun iti mosion, sagudayen ti Section 12 ti Omnibus Election Code nga asinoman a tao… a nasentensiaan… gapu iti krimen a nakainbolbaran iti moral turpitude, diskualipikado nga agkandidato wenno agtakem iti aniaman nga puesto, malaksid no naikkan iti pardon wenno amnestia.

Kinuna ni Baterina a krimen a nakainbolbaran iti moral turpitude ti drug trafficking, ket daytoy ti mangdiskualipika ken ni Singson kas kandidato wenno agtakem iti publiko a puesto.

Ngem insungbat ni Singson a saan a sakup ti hurisdiksion ti Hong Kong court ti linteg ti pagilian.

Innayon ni Singson a sakbay a nagipila iti sertipiko ti kandidaturana, naikonsultanan dayta kadagiti abogadona ket inggarantia dagitoy a balido ti kandidaturana.

Inawat pay ni Singson ti karit ni Baterina nga agpaeksamenda iti droga tapno matulnekanen ti alegasion ti kampo ti kasupangetna a kandidato  nga agar-aramat iti droga.

Iti panangakseptar ni Singson iti karit ni Baterina, kinunana nga “uray isbo, buok ken uray aniaman”, sisasagana a mangipa-drug test.

Kanaig daytoy, kinarit ni Singson ni Baterina nga ag-joggingda iti lima a kilometro tapno makita dagiti botante no physically fit a tumaray a kas lider iti umuna a distrito ti probinsia.

Awan pay ti desision manipud iti Comelec mainaig iti disqualification case maikontra ken ni dati a Congressman Singson.#