BANNER NEWS: Agkabsat a Singson, Savellano, nakaipilan iti SOCE sakbay ti Comelec deadline

VIGAN CITY – Nakaisubmitedan iti Statement of Contributions and Expenses (SOCE) sakbay pay ti deadline nga intuding ti poll body.

Daytoy ti reaksion ni Gov. Luis Ryan Singson mainaig iti inwaragawag ti Commission on Elections a karaman ti naganna, ti bise gobernador ken ti congressman iti first district  ti Ilocos Sur iti listaan dagiti elected officials a saan a nagidatag iti SOCEda ket kasapulan a bumabada iti puestoda agingga iti saanda a naan-anay a makatungpal iti paglintegan ti Comelec.

“Ti million dollar question ket no apay nga inruarda ti nagantayo idinto nga ammoda (provincial Comelec officials) a nagipilatayo idi Hunio 11, 2013,” kinuna ni Singson.

Dinakamat pay ti gobernador a nakaisubmite metten iti SOCE ni Diputado Ronald Singson idi pay la Hunio 11, idinto nga idi Hunio 13 ni Vice Gov. Deogracias Victor Savellano.

Iti immun-una a waragawagna, imbilin ni Comelec Chairman Sixto Brillantes iti ibababa iti puestoda dagiti nasurok 400 nga elected officials a pakaibilangan dagiti 20 a diputado, 4 gobernador, 1 bise gobernador, 26 mayor, 35 bise mayor, 278 konsehal, 11 provincial board members ken 48 city board members agsipud ta saanda a nagisubmite iti SOCE.

Malaksid ken ni Gov. Singson, karaman pay iti listaan ti tallo pay a gobernador a pakaibilangan da Pangasinan Governor Amado Espino Jr., Batangas Governor Vilma Santos, ken Laguna Governor ER Ejercito.

Kinuna ni Singson a nakigtot idi naammuanna ti waragawag ti Comelec Manila a saan a nagipila iti SOCE idinto nga inyunay-unayna a bineripika pay koma nga immuna ni Comelec Chairman Sixto Brillantes ti rekord ti Provincial Comelec sakbay a nagiwaragawagda.

Iti sabali a bangir, iti maysa nga statement, kinuna ni Senate President Pro-Tempore Ralph G. Recto, asawa ni Batangas Gov. Vilma Santos a nagipila ni Santos iti SOCEna idi Hunio 6.

Kinuna ti senador a rinebioda dagiti dokumento nga insubmiteda ket awan met ti nakitada a nagbiddutanda.

“Pinakaammuandakami koma ti Comelec no adda biddutmi, no adda, tapno naaturmi koma,” kinuna pay ti senador.

Kinuna pay ti Comelec  nga adda gayam insubmite ni Pangasinan Gov. Amado Espina, Jr. a SOCE idi Hunio 10, 2013, kabaliktad ti immuna a waragawag ti poll body a saan a nagipila ti gobernador.

Iti election code, naituding laeng a P1.50 ti busbosen ti tunggal kandidato kada botante a nakarehistro iti distritona.

Sumangsango ni Gov. Ejercito iti kaso a pannakadiskualipika gapu iti mapapati a sobra a panaggastona kas kandidato para gobernador ti Laguna.#