BANNER NEWS: Agtuturay ti Vigan City, dakkel namnamada lumsot ti siudad iti 14 finalists iti New7Wonders Cities

VIGAN CITY – Natalged ti namnama dagiti opisial ditoy siudad ti pannakairamanna a sumagpat iti sumaruno a phase kalpasan ti panaggibus ti panagbubutos iti umuna a lawas ti Hulio daytoy a tawen para  kadagiti 21 finalists iti New7Wonders Cities of the World .

Kinuna ni Mayor Eva Marie S. Medina a maragsakan unay iti aglaplapusanan a suporta manipud kadagiti nadumaduma nga ahensia ti gobierno, pribado a sektor ken gunglo, ken dagiti personalidad a nagsurat kenkuana a nangitedanda iti suportada iti kampania ti Vigan a mairaman iti 21 finalists iti New7Wonders Cities of the World a manamnama a maammuan inton Hulio 7.

Kinuna ni Medina a kiniddawen ti Catholic Bishops Conference of the Philippines kadagiti amin a katoliko iti pagilian iti panangibutos ken panangikampaniada iti Vigan a maysa iti 7NewWonders Cities of the World malaksid laeng ti panangikarkararagda iti panagballigi ti siudad iti daytoy a kampaniana.

Kinuna ti mayora a nagsurat metten ni MMDA chairman Francis Tolentino nga ipalubosna ti pannakaikabil dagiti promotion materials ti Vigan kadagiti kangrunaan a kalsada iti Metro Manila, kas iti EDSA.

Dinakamat pay ni Medina nga impatalged metten ti Philippine Tourism Board, Department of Tourism, Philippine Tourism Operators Association ken dadduma pay nga ahensia a pakairamanan ti Tourism Infrastructure and Enterprise Zone Authority nga idadauluan ni Mark Lapid iti suportada iti Vigan.

Nangipatulod metten ti PNP Headquarters babaen ken ni PNP Chief Allan Purisima iti memorandum iti kapolisan tapno tumulongda iti kampania ti Vigan, kinuna ni Medina.

Uray ti Opisina ti Presidente, inyendorsarna metten ti suportana iti bid ti Vigan City a mairaman iti 7NewWonders Cities of the World babaen ti National Historical Commission, DILG, DoT, National Commission on Culture  and Arts (NCAA), Philippine Information Agency (PIA), DepEd, ken dadduma pay nga ahensia ti gobierno.

Nangipatulod metten ti League of Cities iti panangidaulo ni Mayor Herbert Bautista iti advisory kadagiti amin a miembro tapno suportaranda ti kampania ti Vigan City ken iti pannakaikabil dagiti promotion materials kadagiti kangrunaan a pagdaliasatan dagiti lugan iti Quezon City.

Dinakamat pay ni Medina nga impatalged metten ti Department of Foreign Affairs ti suportana babaen kadagiti nadumaduma nga embahada ti pagilian iti ganggannaet a pagilian. Innayonna nga adun nga embahada ti dimmawat iti promotion materials ken historia ti Vigan tapno maiwaragawag ti bid ti siudad iti 7NewWonders Cities.

Malaksid dagitoy, naruay dagiti private institutions, ken indibidual a nangikari iti suportada a kas kada Regine Velasquez, Congressman Manny Pacquiao, Enchong Dee, Carlos Cendran ken dadduma pay nga artista iti pelikula ken telebision.

Innayon ti mayora a nataltalged itan ti riknana iti bid ti Vigan agsipud ta malaksid iti online voting, maibutosen ti siudad babaen iti texting ket kas text capital iti lubong, namnamaenna nga agpinsan dagiti kailianna a mangibutos babaen iti text ti Vigan tapno lumsot daytoy a maysa kadagiti finalists iti maudi a tallo a paset ti panagbubutos nga agpatingga inton Disiembre 7 a pannakaiwaragawag ti 7NewWonders Cities of the World.

Manipud iti 28 finalists,  maammuan dagiti 21 finalist inton Hulio 7, maksayanto dagiti siudad iti 14 inton Oktubre santo ti 7NewWonders Cities a maiwaragawagto inton Disiembre.#