Footer

BANNER NEWS: Airline company, planona mangirusat biahe Manila-Vigan

VIGAN CITY – Kas paset ti panggepna  a maaddaan iti rota ditoy iti mabiit,  nangisayangkat ti South East Asian Airlines (SEA Air) iti test flight idi Enero 20 tapno kitaenda ti kasasaad ti Vigan Airport ken tapno maiwaragawagda metten ti panagbiaheda ditoy.

Nupay kasta, segun ken ni Adelberto Yap, agpapaay a Vice President for Flight Operations ti SEA Air, awan pay ti pinal nga aldaw no kaano a mairugi ti operasion  ken no mamin-ano ti biaheda iti kada lawas.

“Dagiti flight marketing agentsmi ditoy Vigan ti makaammo ngem initially, mamindua siguro iti kada lawas,” kinuna ni Yap.

Nupay saan pay laeng nga imbuksilan ti opisial no mano ti bayad ti single fare, impanammama ni Yap a nalaklaka ngem iti immuna nga airline a naaddaan iti biahe ditoy.

Addaan iti kapasidad a 32 ti eroplano nga inusarda iti umuna a panaglapagda iti Vigan.

Impalgak pay ni Yap a naggapu ken ni Gov. Luis “Chavit” Singson ti idea ti rota idi iyawisna ti panagsangladda iti Vigan.

“Ammomi nga adu ti turista a mayat a mangdiskobre kadagiti sabsabali pay a lugar iti pagilian a saan laeng nga iti Boracay ngem saanda a makadanon gapu iti inaccesability ti lugar. Ngarud babaen ti SEA Air, maaddaanda met iti gundaway a mangdiskobre iti kinapintas ti Ilocos Sur,” innayon  ni Yap.

Maipalagip a naaddaan met iti biahe ti Inter-island Airlines idi 2008 ngem saan a nagpaut gapu iti kinakirang ti pasahero. Kangrunaan idi a rason ti kinangina ti single fare nga umabot iti nasurok P3,000.#