BANNER NEWS: Anak ti dati nga OFW, sex toy ti kalib-inna iti 5 a tawen

BANTAY, Ilocos Sur – Iti aganay lima a tawen, pinagbalin ti maysa a dati a sangguniang kabataan member a sex toy ti anak ti kalib-inna a dati nga overseas Filipino worker.

Daytoy ti limtuad idi  naisalakan ti biktima manipud iti suspek kalpasan ti  panangraut dagiti polis ti pagtaengan daytoy  iti Barangay Cabcaburao, Burgos, Ilocos Sur idi agsapa ti Nobiembre 30.

Kinuna ni Officer-in-Charge Senior Supt. Noel Baguitan Amoyen a saan a nagresistir ti suspek idi makitana a nalawlaw ti pagtaenganna kadagiti polis.

Rinaut dagiti nagtitipon nga elemento ti Ilocos Sur Provincial Police Office nga indauluan ni Amoyen ken CIDT nga indauluan ni Chief Inspector Arbel Mercullo ti pagtaengan ni Constante Bolante, Jr. y Carta, 34, residente iti nadakamat a barangay, kalpasan a nagpatulong kadakuada ni Jean Maniego, 33, dati nga OFW a taga-Pampanga, nga isalakanda ti anakna a ni Angel (parbo a nagan) a mapapati a rinamrames ti suspek sipud pay idi 2007 nga agtawen daytoy iti sangapulo ket maysa.

Nakakumpiska pay ti raiding team iti balay ti suspek iti uppat a paltog a pakairamanan ti M16 AR (Elisco) nga addaan iti serial No. 0327465 nga addaan lisensia nga agpaso inton Agosto 1, 2015; maysa a cal. 45 pistol (Armscor) nga addaan lisensia nga agpaso inton Agosto 1, 2013 nga addaan magasin a nagkarga iti 7 a bala; maysa a cal. 45 pistol (Llama) nga awanan serial number; ken maysa a cal. 22 rifle (Armscor Air Rifle, converted); 7 long magazines para M16 AR; 4 magazines para cal. 45 pistol; 35 a bala para cal. 45; 3 a basyo ti cal. 22; 15 basyo ti cal. 22; 3 basyo para cal. 22, ken 2 selpon a Nokia.

Ngem kinuna ni Officer-in-Charge Senior Supt. Noel Baguitan Amoyen a saan nga inannugot ni Bolante, 34, residente iti nadakamat a barangay, ti maipabpabasol kenkuana a panangramramesna iti biktima.

“Awan ti tao a mangako iti nagbasolanna,” kinuna ni Amoyen ken ni Jun Ramos iti pannakiuman daytoy kenkuana a naipatangatang iti DWRS idi Disiembre 2.

Kinuna ni Amoyen nga uray ti biktima ket dina kayat ti agsarita idi damo agsipud ta “binutbuteng ti suspetsa” ngem nagpudno met laeng idi “makarikna iti panagtalek” kadagiti polis.

Kinuna pay ti kabarbaro nga mangidaulo iti PPO Ilocos Sur nga impalgak ni Angel a rinugian ni Bolante a ramesen manipud pay idi 2007 ken naanakan daytoy.

Kinuna ni Amoyen nga ikkanda iti seguridad dagiti biktima ken ti inana tapno awan ti dakes a mapasamak kadakuada.

Kinunana pay a pa-validateda iti Crame no napabaro ti lisensia dagiti paltog ken no naaramat dagitoy iti dakes nga aramid.#