BANNER NEWS: Apo Pidiong, naipasublina dignidad ti pagilian – VP Binay

VIGAN CITY – Dinayaw ni Vice President Jejomar “Jojo” Binay daydi nag-Presidente Elpidio Quirino a kas “maysa a mabigbig a Pilipino ken bannuar ti pagilian.”

“Naipasublina ti panagkaykaysa, dignidad ken ibabangon ti pagilian kalpasan ti pannakadadaelna  iti kalkalpas a maikadua a gubat sangalubongan. Naaramidna dayta babaen ti panangiyunana ti pakaseknan dagiti tattao uray kaipapanan dayta ti panangisakripisiona iti bukodna a bagi,” kinuna ni Binay bayat ti pannakalukat ti maysa a marker iti sakaanan ti monumento ti Ilokano a nagpresidente idi Nobiembre 16 a pannakailagip ti maika-120 a panangkasangayna.

Iti daytoy nga aldaw, impaima ti Philippine Historical Commission of the Philippines nga imbagi ni Officer in Charge Emelita Almosara ti historical marker iti Ilocos Sur ken dagiti kakabagian ni Quirino iti panangidaulo da Cory Quirino, Eduardo Quirino, Luis Elpidio Gonzales, Luisito Gonzales, Ruby Quirino Gonzales.

Kinuna met ni Vice Gov. Deogracias Victor Savellano a nangibagi ken ni Gov. Luis “Chavit” Singson a napintas a pagtuladan ti inaramid ti sigud a presidente idi isu ti nangidaulo iti pagilian.

“Impakitana a ti maysa nga adipen ti turay ket masapul nga umun-una ti panagserbina kadagiti tattao ngem iti bagina. Babaen itoy, mapasublitayo ti kinadalus ken kinasayaat ti serbisio nga ipaay ti gobierno kadagiti umili,” kinuna ni Savellano.

Naluktan met ti President Elpidio Quirino Memorabilia Hall a masarakan iti Syquia Mansion iti siudad ti Vigan kalpasan ti floral offering iti sanguanan ti provincial capitol.  Ditoy a makita dagiti daan a ladawan ti presidente ken dagiti daan nga aruatenna.

Naipasdek ti nasao a museo babaen ti panangtitinnulong dagiti nabati a kakabagian ni Apo Pidiong ken iti suporta dagiti gagayyemda nga agtrabtrabaho iti gobierno. Aglukat ti President Elpidio Quirino Memorabilia Hall iti 9 am-5 pm manipud Lunes agingga iti Sabado.

Kalpasanna, dimmagas ni Binay iti Caoayan tapno dar-ayanna ti panagpiesta daytoy nga ili sakbay a nagturong iti Baluarte tapno agsarita iti joint meeting ti League of Mayors of the Philippines ken Vice Mayors’ League of the Philippines, Ilocos Sur Chapter ken iti induction dagiti baro nga oipisial ti Alpha Phi Omega Fraternity.#