BANNER NEWS: Barangay captain, nakipinnaltog nanggandat biagna

CABUGAO, Ilocos Sur – Ginandat ti dua a lalaki ti biag ti barangay captain iti Barangay Daclapan ditoy nga ili idi malem ti Enero 10, ngem saanda a nagballigi ta nakipinnaltog ti biktimaenda.

Iti report a dimmanon iti polis ditoy, dua a lalaki a riding in tandem ti nanggandat iti biag ni Daclapan Barangay Captain Wilfredo Terrago y Padilla ditoy nga ili ngem napaayda iti dakes a panggepda agsipud ta mapapati a nakipinnaltog daytoy kadagiti suspek a puon ti naglibasanda.

Nabigbig dagiti suspek a da Jopel Reton, residente iti Barangay Turod, ken ni Edgar Sinco, 33, baro, residente iti Barangay Pug-os ditoy nga ili.

Kanaig daytoy, madama ti panagsawar dagiti polis kadagiti ospital ken klinika a nakaipanan ti nasugatan a suspek.

Naammuan iti inisial nga inbestigasion dagiti polis nga agtugtugaw da Terrago, Barangay Kagawad Cesar Ramboanga ken dadduma pay a kalugaranda idi kellaat a simmardeng ti maysa a Honda Wave a motorsiklo a nagluganan da Reton ken Sinco ket pinaputokanda ni Terrago ngem saanda a napuntaan.

Pinaputokan met ti barangay captain dagiti suspek a mapapati a nakasugatan ti maysa.

Segun pay iti report, iti panaglibas dagiti suspek simrekda iti balay ti maysa a Cesar Cabasug iti Purok Balligi, Sitio Panay-ogan, Barangay Daclapan ngem idi nagturong dagiti polis iti nadakamat a lugar, awan dagiti suspek.

Kitkitaen dagiti inbestigador no adda pakainaigan dagiti pammaltog iti kallabes iti daytoy kaudian a napasamak.

Maipalagip nga idi Oktubre 4, 2010, pinaltopaltogan dagiti armado a tattao ti grupo ni Sinco a pakairamanan da Reymon Lorenzo y Blaza, 24, naasawaan, residente iti Barangay Daclapan, Cabugao; ken Regie Pagud y Gamuyod, 25, residente iti Barangay Pug-os bayat ti panagdaliasatda a nakamotorsiklo iti national highway a sakup ti Barangay Pug-os ket nabigbig dagiti suspek a da Basilio Yadao, residente iti Barangay Teppeng; Bohot Sayo Baclig, residente iti Barangay Pug-os; Michael Yadao, residente iti Barangay Pug-os, maysa a Rolly ken dua pay a di nabigbig a lallaki.

Awan pay makalawas kalpasanna, napaltogan idi malem ti Oktubre 8 ni Reymon Lorenzo y Blaza, ken ti kalugaranna a ni Tony Blaza, iti national highway iti Barangay Pug-os.

Naideklara a natayen ni Lorenzo idi maidanon iti Pira Clinic and Hospital.

Kasta met a naireport iti polis idi Oktubre 23, 2010 a mapapati a pinaltogan ti grupo ni  Terrago ni Mayor Edgardo Cobangbang ken kaduana idi addada iti Barangay Daclapan.

Nupay kasta, kinuna ti grupo ti barangay captain a ti drayber ti mayor ti immuna a nagpaputok gapuna a simmungbat a nagpaputok ni Ryugi Sugano y Belo, 23, security guard, ken residente iti Barangay San Jose, Candon City.

Nakasaklangen iti Korte ti kaso maikontra ken ni Sugano.#