BANNER NEWS: Barangay captain, polis, nagudas iti shooting incident iti provincial capitol

VIGAN CITY – Nagudas ti barangay captain ti Daclapan, Cabugao, Ilocos Sur ken maysa a polis a naka-assigned iti Provincial Police Office iti panagpipinnaltog a napasamak idi pasado alas dose ti malem ti Abril 11 iti abagatan a paset ti provincial capitol ditoy siudad.

Segun iti report ti polis ditoy, nakaawatda iti tawag iti telepono manipud iti maysa a residente a nangipakaammo nga adda napasamak a pinnaltog iti Burgos Street, Barangay III iti asideg ti provincial capitol.

Nagresponde a dagus dagiti polis nga indauluan ni PCI Ernesto Navarro, Jr., ket nadatnganda a dead on the spot ni Barangay Captain Wilfredo Terrago y Padilla, 45, naasawaan, ken residente iti Barangay Daclapan, Cabugao, Ilocos Sur, idinto a nakadasay iti asideg ti bangkay ti barangay captain ni SPO1 Rommel Rebuldela, naasawaan, PNP member a nakadestino iti Ilocos Sur Provincial Police Office, Bulag, Bantay, Ilocos Sur.

Naitaray ni Rebuldela iti Metro Vigan Cooperative Hospital ngem pimmusay daytoy bayat ti pannakataming dagiti sugatna.

Nasugatan met babaen ti stray bullet ni Annabel Tabaniag y Almachar, 38, empleada ti Vigan City Hall a nairana nga adda iti asideg idi napasamak ti mapapati nga engkuentro iti nagbaetan ti grupo ti barangay captain ken ti polis.

Nangisayangkat dagiti polis iti pursuit operation iti maysa a motorsiklo a mapapati nga inaramat dagiti suspek iti panaglibasda kalpasan ti pammaltog ken pinakdaaranda dagiti kabangibang ti siudad a police station iti panangipakatda iti dragnet operationĀ  ngem nakalusot dagitoy.

Segun iti inisial nga inbestigasion dagiti polis, nagturong ni Rebuldela iti provincial capitol tapno kitaenna ti iskediul ti maysa a hearing ket idi rimmuar, maipagarup nga adda nakitana a tattao a suspetsado ti tignayda a puon ti panangsitarna kadakuada a nagtungpal iti mapapati a panagpaputok ti agsumbangir a nakagudasan ni Terrago ken ni Rebuldela.

Ngem awan pay ti limtuad a testigo a makailawlawag wenno makaitudo no ania ti nagramutan ti pinnaltog ken no asino ti immuna a nagpaputok.

Nakarekobre dagiti inbestigador ti Scene of the Crime Operation (SOCO) kadagiti sumagmamano a kapsula a mapapati a nagtaud iti M16 rifle ken cal. 45 iti nakapasamakan ti pammaltog.

Maysa a Ford Everest a mapapati a nagluganan da Terrago iti ipapanda iti Vigan ti napanawan a nakaparking iti sanguanan ti provincial library ket sinukimat ti SOCO daytoy para iti posible a lead iti shooting incident.

Kinuna ni Dopale nga iti statement a naalada iti barangay tanod ken barangay official a kadua ni Terrago, adda naawat ti biktima a death threat isu a kaduana ida.

Idi Enero 10 daytoy a tawen, ginandat a papatayen ti dua nga armado a tattao ni Terrago ngem nakipinnaltog daytoy.

Nainaganan dagiti suspetsa a da Edgar Sinco, 33, residente iti Barangay Pug-os ken Jopel Reton, residente iti Barangay Turod, iti Cabugao.

Kasta met nga idi Oktubre 23, 2010, naireport a mapapati a pinaltogan ti grupo ni Terrago ni Mayor Edgar Cobangbang ken kaduana idi addada iti Barangay Daclapan a baluarte ti kapitan.

Impakaammo ni Provincial Director Police Senior Supt. Eduardo Dopale, Jr. a malaksid kadagiti inbestigador manipud iti Provincial Police Office, ti CIDG-Ilocos Sur, ken Vigan City police, nangibaon pay ti regional director iti inbestigador para iti naan-anay a pannakainbestiga ti nasao a shooting incident.

Kinuna ni Dopale a naipatuloden iti crime laboratory iti rehion dagiti kapsula a narekobre iti crime scene ken ti cal. 45 para iti ballistic examination tapno maammuan no naiputok daytoy wenno saan.

Kanaig daytoy, narelibo ti hepe ti polis ti Vigan City gapu iti mapapati a saan a nasayaat a pannakaipatungpal ti integrated police patrol system isu a napasamak ti shooting incident.#