BANNER NEWS: Baro a guidelines iti gun permit, inyisio ti PNP

MANILA – Nangiyisio ti Philippine National Police iti kabarbaro ken naing-inget nga annuroten iti panagaplay iti Permit To Carry Firearms Outside of Residence (PTCFOR) itay nabiit.

Kinuna ni Senior Supt. Reuben Theodore Sindac, hepe ti police information office, amin a lisensiado nga agtagikua iti armas nga agaplay para kadagiti pribiliheo iti panagikuyogda iti paltog ket mangisubmite iti biometric fingerprint specimen ken retrato kas mandatory a kasapulan para iti pannakaiyisio iti PTCFOR.

Kinuna ni Sindac a saanen a kas idi, amin a lisensiado a gun owners nga agaplay para iti PTCFOR ket personal nga agparang iti Camp Crame ken kadagiti kampo ti polis iti probinsia kabayatan ti panagaplayda.

Kinuna ni Sindac a saanen a maawat dagiti photocopied nga aplikasion ket imballakadna a sa laeng mangala dagiti aplikante iti application form kalpasan a malpasda amin dagiti requirements.

Kasapulan a leppasen nga aramiden dagiti aplikante amin dagiti requirements kas iti clearances manipud iti National Bureau of Investigation tapno matsek no addaanda iti aniaman a kriminal a rekord ken iti Police Directorate for Intelligence para iti background checking, photocopy ti lisensia ti paltog ken threat assessment manipud iti lokal a polis a pakasarakan iti residensia ti aplikante.

Kadagiti opisial ti gobierno ken miembro ti unipormado a serbisio ti gobierno, mangalada pay iti Appointment Order no empleadoda ken Oath of Office no nabutosanda nga opisial.

Kalpasan ti pannakaebaluar dagiti requirements ken ti application form, maala ti fingerprint ti aplikante iti PNP Crime Laboratory sadiay Camp Crame ken iti sumagmamano a regional police camps, ken iti pannakaretratona.

Addanto bayadan ti aplikante iti pannakaala ti lemma dagiti ramayna ken iti panagparetratona, segun ti opisial.

Maipatulod ti application form ken dadduma pay a requirements iti Opisina ti Hepe ti PNP para iti pannakaaprobarna. No maaprobaran, mapakaammuan dagiti aplikante babaen ti eletronic mail wenno short messaging system (SMS), a pakailanadan dagiti bayadanna ken no kaano ti pannakaalana iti permitna.

Kinuna ni Sindac a naiyussuat amin dagitoy a proseso tapno ma-pasayaat pay dagiti agdama a sursuroten iti panagpalisensia iti paltog a kangrunaan a panggepna ti naing-inget a kampania maikontra kadagiti delingkuente nga agtagikua iti paltog ken dagiti agik-ikut kadagiti loose firearms.

Segun iti liderato ti PNP, ti operasion maikontra kadagiti loose firearms ti maysa kadagiti kaepektibuan a rimienta maikontra iti organized armed groups, partisan armed groups ken wanted persons gapu ta dagitoy ti agar-aramat kadagiti loose firearms iti panangisayangkatda iti illegal nga aktibidadda.

Iti napalabas nga innem a bulan iti daytoy a tawen, nakaisayangkaten ti PNP iti 464,996 a panagbisita iti pagtaengan dagiti rehistrado nga agtagikua iti paltog a nagpason tapno mapalagipanda iti obligasionda a mangpabaro iti rekord ti armasda.#