BANNER NEWS: Boy scouts a karaman iti plane crash, nakaradkadda a dimmar-ay iti Ilocos Region jamboree

CABUGAO, Ilocos Sur – Ti delegasion ti Batanes ti katibongan iti sipsipat idi maiyam-ammo dagiti partisipante iti 4th Joint Ilocos Region and North Eastern Luzon Regional Jamboree a naangay iti  Barangay Daclapan ken Namruangan, ditoy nga ili idi Disiembre 1-5.

Iti baet ti nagdalananda a peggad a dandani nakatayanda idi emerhensia a simmanglad ti naglugananda nga eroplano iti karayan iti paset ti Iguig, Cagayan idi Nobiembre 28, nakaradkad a nakadar-ay ditoy ti sangapulo ket maysa a delegado manipud iti probinsia ti Batanes.

Segun ken ni Boy Scout of the Philippines Council Chairman ti Batanes Jack Castaño III, agarup 12:40 ti malem idi madlawna a simmardeng ti makina ti naglugananda a Beechcraft light plane nga addaan Tail No. RPC–111 aganay 3,000 kadapan ti kangatoda pay laeng iti tangatang, nakurang a 9 a kilometro ti kaadayoda iti Tuguegarao airport a paggasolinaan ti eroplano sakbay nga agturong iti Laoag airport a destinasionna.

Iti paset ti Cagayan River ti nakatnagan ti eroplano. Nupay kasta, nagsagrap laeng dagiti pasahero iti minor injuries agraman dagiti piloto.

Malaksid ken ni Castaño, tallo a boy scouts,  da John Harold Agito, Benedict John Acebes and Giovanni Pahodpod, ti kaduana iti eroplano tapno mapanda makipartisipar iti jamboree iti Ilocos Sur.

Nasurok a 7,000 a boy scouts, senior scouts ken scout masters manipud iti Rehion 1, 2, 3 ken Cordillera Administrative Region ti dimmar-ay iti nasao a jamboree.

Karaman kadagiti dimmar-ay dagiti BSP councils manipud iti Abra, Batanes, Cagayan, Kalinga, Apayao, Isabela, Ifugao, Ilocos Norte-Laoag City, Ilocos Sur, La Union, Nueva Viscaya, Mountain Province, Benguet, Quirino, Tuguegarao City, Eastern Pangasinan-Dagupan City, North Eastern Pangasinan-San Carlos City, Baguio, Santiago City, Caoayan City ken ti guest council a Nueva Ecija.

Da BSP Ilocos Sur Chairman ken Ilocos Sur Vice Governor Deogracias Victor “DV” Savellano ken Cabugao Mayor Edgardo Cobangbang Jr. ti nangilukat iti Regional Jamboree babaen ti panangingatoda iti official logo bayat ti opening program.

Iti panagsarita ni Jose Rizal C. Pangilinan, Secretary General ti Boy Scouts of the Philippines, kinunana a maysa daytoy a naisangsangayan nga achievement para iti BSP Ilocos Region ken North Eastern Luzon ta agbalin daytoy a highlight ti scouting career dagiti dimmar-ay.

“Masapul a makigayyemtayo kadagiti padatayo nga scouts ken agsursurotayo bayat ti jamboree. Babaen itoy, makapagtitinnulongtayo a mangpasayaat iti masakbayan,” kinuna ni Pangilinan.

“Scouts build tomorrow today” ti tema ti scouting event tatta a tawen.

Kinuna ni Castaño a nakatulong kenkuana ti padasna iti Air Force ket napagkalma ken naalay-ayanna ti danag dagiti kaduana a boy scouts bayat ti  panagsuek ti luganda.

Daytoy ti maikatlo a pannakapadas ni Castaño a madisgrasia iti eroplano, namindua idi aktibo pay laeng nga opisial ti Phil. Air Force.#