BANNER NEWS: Budol-Budol Gang members a natiliw iti Sudipen, La Union, wanted iti Baguio City

CANDON CITY – Kalpasan ti pannakaapput ken pannakaarestoda iti checkpoint sadiay Sudipen, La Union mainaig iti panangballaiboda iti maysa a retirado iti gobierno a baket a taga-Tagudin, Ilocos Sur, sabali pay a warrant of arrest ti naiserbi kadagitoy nakadetene iti pagbaludan ditoy siudad a kameng ti Budol-Budol Gang idi malem ti Enero 21 .

Uppat a warrant of arrest nga inyisio iti tallo a hues iti Baguio City ti inserbi ti kapolisan ti Baguio City nga indauluan ni Police Inspector Blainsandrew B. Dao-anis kada Lolita delos Reyes y Genese, 57, awanan asawa, residente iti Brgy. Tiblong, San Fabian, Pangasinan; Raquel dela Cruz y Genese a.k.a. Raquel dela Cruz y Rimando, 37, naasawaan, residente iti Brgy. Pagas, Cabanatuan City, Nueva Ecija/ Rabon, San Fabian, Pangasinan; ken Rowena Valdez y Genese, naasawaan ken residente iti Brgy. Pandan, Alaminos, Pangasinan.

Sagdudua a warrant of arrest nga inyisio ni Judge Rose Mary R. Molina Alim ti Regional Trial Court 7, Baguio City; ken ni Judge Cecilia Corazon S. Dulay-Archog ti Regional Trial Court 6, Baguio City, ti naiserbi kada delos Reyes ken dela Cruz mainaig iti kasoda a panagtakaw ken estafa kadagitoy a korte.

Nairekomenda nga agpiansa dagiti akusado iti sag-P50,000.00 iti kasoda a theft ken sag-P100,000.00 iti kasoda nga estafa.

Sabali pay a warrant of arrest nga inyisio ni Dulay-Archog ti naiserbi ken ni dela Cruz mainaig iti sabali pay a kasona nga estafa ket nairekomenda nga agpiansa iti P100,000.00.

Kabayatanna, naiserbi met ti warrant of arrest nga inyisio ni Judge Mona Lisa V-Tiongson-Tabora maikontra ken ni Rowena Valdez y Genese, 41, naasawaan, ken residente iti Barangay Pandan, Alaminos, Pangasinan mainaig iti kasona a theft ket nairekomenda nga agpiansa iti P36,000.00.

Maipalagip a naapput dagiti suspek a kameng ti Budol-Budol Gang iti checkpoint nga impasdek ti Sudipen Police Station iti panangidaulo ni Chief of Police Jose Bingayan kalpasan a naitimbre kadakuada ti ilalasat ti bunggoy a naglugan iti Nissan, Box Type nga inaramatda a getaway vehicle kalpasan nga intarayda ti kuarta ken alahas ni Delia Cablayan Dauz, 74, retirado a government employee ken residente iti Barangay Becques, Tagudin, Ilocos Sur.

Narekobre dagiti polis ti P400,000.00 nga inyaon ti biktima iti maysa a bangko sadiay Candon City ken dagiti alahasna iti uneg ti lugan dagiti suspek.

Nakakumpiskada pay manipud iti lugan kadagiti peke nga alahas a mapapati nga ar-aramaten dagiti suspek a pangliwliw iti biktimaenda.

Segun iti polis, bayat ti kaadda ni Dauz iti San Fernando City, La Union, ginayyem dagiti suspek ket imbagada a negosianteda ken agbirbirokda iti kasosioda iti negosio.

Babaen ti natagapulotan a panagbalbalikasda, naguyugoyda ti baket a mangisosio iti kuartana ket nagkukuyogda a dimmagas iti balay ti biktima iti Barangay Becques, Tagudin, Ilocos Sur a nangalaanna iti kuartana ken alahas ken iti libreta ti depositona iti bangko, kas sosiona iti negosio.

Manipud iti Tagudin, nag-turong ti grupo iti maysa a bangko iti Candon City no sadino nga inyaon ni Dauz ti depositona a P400,000.00.

Kinuna ti polis nga idi naiyaon ni Dauz ti kuarta, intedna kadagiti suspek idinto nga imbati dagitoy ti bag nga impakilapda a naggianan dagiti rineppet a kuarta sada imbaga iti baket nga aguray iti maysa a fast food a panganan iti met laeng Candon City ta adda pay sabali a papananda.

Naguray ni Dauz iti naituding a pagkikitaanda ngem saannan a nauray dagiti kinatulagna.

Naduktalanna laengen a narugrugos a rineppet a papel ti linaon ti bag nga imbati dagiti suspek.#